भांगरभूंय | प्रतिनिधी
पणजी ः टोंका करंजाळे वाठारांत काल रातीं जाल्ल्या गँगवॉरांत गुन्यांवाकार सूर्यकांत कांबळी उर्फ सूर्या (ताळगांव) हाचेर मास्क घाल्ल्या अनवळखी मनशांनी धारदार शस्त्रांनी हल्लो केलो. हे घडणुकेंत सूर्या गंभीर जखमी जाला. ताचेर जीएमसीत उपचार चलतात. आदल्या दुस्मानकायेंतल्यान हो हल्लो केला, असो पुलिसांक मुळावो अदमास आसा.
सूर्याच्या आड पणजी पुलीस स्टेशनांत 4, आनी पेडणें, दिवचल, कळंगुट आनी साळगांव पुलीस स्टेशनांत दरेकी एक मेळून वट्ट 8 गुन्यांव नोंद जाल्यात. जिवें मारपाची धमकी, मारपेट आनी शस्त्रां दवरपा संबंदी हे गुन्यांव आसात. सूर्याचेर काल टोंक हांगा आसतना, अचकीत काळो मास्क घाल्ले हल्लेखोर आयले आनी तांणी शस्त्रांनी ताचेर हल्लो केलो. हांतूत तो गंभीर जखमी जालो. उपरांत ते हल्लेखोर पळून गेले.
मजगतीं, हो हल्लो करपा फाटलें नेमके कारण कितें? तो कोणें केलो? हाचो पुलिस सोद घेतात. निरिक्षक निखिल पालेकार हांच्या मार्गदर्शना खाला उपनिरिक्षक मयूर पणशीकार फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
