भांगरभूंय | प्रतिनिधी
होमखण
खरें म्हणल्यार हे टॉवर मोडिल्ल्यान जें लुकसाण जालां तें त्या भ्रश्टाचारी लोकां कडसून भरून घेवंक जाय आसलें. हाणीं खंय घरां घेवन दवरल्यांत तीं सोदून जांचें सपन भंगलां तांकां दिवंक जाय आसलीं.
–
भ्रश्टाचाराचो कळस म्हणून जाचेर जायतो तेंप चर्चा चलताली ते नोयडाचे जुंवळे टॉवर निमाणें सर्वोच्च न्यायायलाच्या आदेशान मोडले. एकतीस आनी बत्तीस माळ्यांचे हे जुंवळे टॉवर फकत णव मिनटांनी कोसळ्ळे. जाणीं कोणे मोठे उमेदीन घर घेवचें थारावन ह्या टॉवरांनी बूक केल्लें, जे कोण स्वताच्या घरांत रावपाचें 2005 तल्यान सपन पळेताले तांचें सपन मोडूंक फकत णव मिनटां लागलीं. णव मिनटांनी सगळें घस्स जालें आनी घराचें सपन भंगलें. तशें हें सपन एक वा दोग जाणांचें नासलें, सयशें तेत्तीस लोकांचें सपन आसलें तें. 2005 ते 2022 मेरेन दोळ्यांत तेल घालून म्हणटात तशें ह्या लोकांनी सपन पळेल्लें. आनी त्याच दोळ्यांनी तें मातये भरवण जाल्लेंय पळेलें. आतां ह्या लोकांची चूक तरी कितें? बरेंऽ सपन पळोवप ही चूक? आं, आतां तांची एकूच चूक जाली म्हणूं येता. ती म्हणल्यार ताणीं कोणाचेर तरी विश्वास दवरलो. कोणाचेर? तर सरकारी कारभाराचेर, सरकारी खात्यांचेर. नोयडा विकास प्राधिकरणान प्लान पास केले म्हणून तर हे टॉवर जाल्ले न्ही. आतां ताणीं भ्रश्टाचार केला म्हणपाचें ह्या सामान्य लोकांक कशें कळपाचें? जीं कागदां ह्या लोकांच्या हातांत आयलीं तातूंत भ्रश्टाचार केला म्हणपाचें खंय आसलें तर? मागीर कोणे कशी परवानगी दिल्या आनी कशे प्लान पास केल्यात तें कशें कळपाचें? सगळीं कागदां सारकीं आसलीं म्हणून तर त्या लोकांनी पयशे भरिल्ले. तांकां खंय खबर ह्या टॉवरांची दाळ भड्डेल्या म्हणून?
दर एकल्याक, ल्हानशें जायना आपलें स्वताचें घर आसचें अशें दिसताच. कितलो तेंप म्हणून कोणूय भाड्याक रावतलो? आनी देखून आपणा कडेन जमता आनी परवडटा तशें तो घर घेवंक पळेता. घर घेवप तितलें सोपें आसना. बँको रीण दिता, ना अशें न्ही पूण बँकेचे सोपस्कार सोंपें आसनात. जे कोण घर घेतात तांचे कडेन स्वताचे कांय दुडू आसचेच पडटा. उरिल्ले बँक दिता. बँकेचो आदवोगाद सगळीं कागदां तपासून ताचो रिपोर्ट करून बँकेक दिता. सगळें सारकें आसत तरूच बँक रीण दिवंक मुखार सरता. आतां जाणीं कोणें 2005 त ह्या नोयडाच्या टॉवरांनी आपणालें घर बूक केलें, तांकां सगळ्यांकूच ह्या सोपस्कारांतल्यान वचचें पडलां आसूंक जाय. समजुंया एकाद्यान रीण काडूंक ना तरी तो दोळे धांपून काय फ्लॅट बूक करचो ना? तोय आपणाल्या आदवोगादाक कागदां दाखोवनूच सही करतलो. आदवोगादाक जेन्ना ह्या टॉवरांनी भानगड आसा म्हणपाचें कळूंक ना तेन्ना सामान्य मनशाक तें कळप कठीणूच.
नोयडा विकास प्राधिकरणान 2005 त सुपरटेक कंपनीक धा माळ्यांचे चोवदा टॉवर बांदूक परवानगी दिली. 200 6त चोवदांचे पंदरा टॉवर जाले आनी माळे धा चे इकरा जाले. 2009 त तांतल्या दोन टॉवरांक चोवीस माळे करपाची परवानगी मेळ्ळी. आनी 2012 त चोविसांचे चाळीस माळे जाले. हाचोच अर्थ 2005 ते 2012 मेरेन कोणतरी आपणालीं बोल्सां भरून घेतालो आनी सुपरटेकाक जाय तशी परवानगी दितालो. 2012 त कोणाच्या तरी लक्षांत हें आयलें आनी ताणीं कोर्टांत वचून ह्या टॉवरांचेर स्टे हाडली. उपरांत कोर्ट कचेरी सुरू जाली आनी 2022 त निकाल लागलो. आतां प्रश्न असो की सगळेच माळे बेकायदेशीर आसले काय 2005 उपरांत मेळिल्ली परवानगी बेकायदेशीर आसली? जर सगळेच बेकायदेशीर जाल्यार इकरा माळ्यांचे पंदराय टॉवर मोडचे पडपाचे. जर 2006 त दिल्ली परवानगी कायद्यांत बसता जाल्यार इकरा माळे दवरून ताचे वयले माळे मोडूंक जाय आसले. पूण हांगा तर पुराय टॉवर जमीनदोस्त केल्या. हो जाणीं घराचें सपन पळेलें तांचेर अन्याय केल्लेवरी जालें ना?
जाणीं पयशे भरिल्ले तांचे पयशे परत मेळतूय पूण जाणीं लोन काडलां तांचे पयशे बँकेक वचपाचे. पूण ताणीं धांव धपटी काडल्यो ताचें कितें? तांचें सपन भंगलें ताचें कितें? बरें खंयचोच बिल्डर पुराय पयशे चेकान घेना. तो कांय प्रतिशें रोकड मागता जाची पावतीबी आसना. त्या पयश्यांची खंयच नोंद आसना आनी ते परते मेळपूय कठीण आसता. ह्याय लोकांनी अशी रोकड दिल्या आसतली. ते पयशे गेले न्ही? दुसरें म्हणल्यार 2005 ते 2022 मेरेन यमुनेंतल्यान खूब उदक व्हांवलां. 2005 तल्यो दरो आज तश्योच उरूंक ना. नव्यान घर घेवंक गेल्यार 2005 तली दर आतां आसचिना. तितल्या दुडवांनी घर मेळप कठीण. अशे वेळार ह्या लोकांनी कितें करपाचें? कांय लोकांक निर्शेवणी आयल्या आसतलीच. ते काय परते घर घेवपाचे भानगडींत पडत शे दिसना.
आतां प्रश्न पडटा तो म्हणल्यार हे टॉवर मोडिल्ल्यान भ्रश्टाचार ना जातलो? कोणतरी कोर्टांत गेले म्हणून हो भ्रश्टाचार उगताडाक आयलो. बाकीचीं घरां नेमान बांदल्यांत? कशें कळपाचें? तें कळूंक कोणेतरी कोर्टांत वचचें पडटलें. कोर्टांत वतकूच कितलीं वर्सां वतात तें दिसताच. घरां मोडटात पूण जाणीं भ्रश्टाचार केला ते सुट्टात. ह्या टॉवरांनी जाणीं भ्रश्टाचार केलो तांकां कितें ख्यास्त जाली? कोर्टान तांचेरूय बडी मारूंक नाका आसली? सामान्य लोकांक त्रास करचे परस ह्या भ्रश्टाचार्यांक मोडून उडोवंक नाका आसले? खरें म्हणल्यार हे टॉवर मोडिल्ल्यान जें लुकसाण जालां तें त्या भ्रश्टाचारी लोकां कडसून भरून घेवंक जाय आसलें. हाणीं खंय घरां घेवन दवरल्यांत तीं सोदून जांचें सपन भंगलां तांकां दिवंक जाय आसलीं. भ्रश्टाचार्यांक जो मेरेन कडक ख्यास्त जायना तों मेरेन सामान्य लोकांचीं सपनां अशींच भंगत रावतलीं.
– अभयकुमार वेलिंगकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
