भांगरभूंय | प्रतिनिधी
खबरां संस्था
दुबयः भारताचो कॅप्टन रोहीत शर्मान आशिया कप सर्तीतले पाकिस्ताना आडचे दुसरे मॅचींक सुरवेकूच धा मिनटांत आपल्या नांवार एक व्हडलो विक्रम केलो. सुरवेक दोन सके मारून ताणे पयल्या 12 धांवड्यां सयत टी-20 क्रिकेटींत सगल्यांत चड धांवड्यो करपी बॅट्समन जावपाचो मान मेळयलो. हाचे पयलीं टी-20त सगल्यांत चड धांवड्यो करपी दादल्यांचे वळेरेंत रोहीत पयले सुवातेर आशिल्लो. मात बायल क्रिकेटींत न्यूझिलंडाची बॅट्सवुमन सुझी बेट्स ताचे परस 11 धांवड्यांनी फुडें आशिल्ली. पाकिस्ताना आडचे मॅचींत रोहितान बायल आनी दातले अशे दोनूय वळेरेंत सगल्यांत चड धांवड्यो करपाचो संवसारीक विक्रम केलो.
सुझी बेट्सनान ताचे परस चड धांवड्यो केल्यात. सुझीच्या नांवार क्रिकेटींतल्या सगल्या फॉर्मेटांत 3531 धांवड्यो आसात. भारत- पाकिस्तान मॅची पयलीं रोहिताच्या नांवार 3520 धांवड्यो आशिल्ल्यो. रोहिताच्या टी-20 कारकिर्दीचेर नजर घातल्यान ताणे आतां मेरेन 134 मॅचींत 27 अर्द शेंकडे आनी 4 शेंकड्या सयत 3520 धांवड्यो केल्यात. हे मजगतीं ताची सरासरी 32 आनी स्ट्रायकरेट 139.84 इतलो आसा. रोहितान आयज मेरेन टी-20त 165 सक्यां सयत दुसरी सुवात राखून दवोरल्या न्यूझिलंडाचो ओपनर मार्टिन गप्टील 171 सक्यां सयत पयले सुवातेर आसा. टी-20त सगल्यांत चड मॅची खेळपी आनी सगल्यांत चड धांवड्यो करपी तो एकसुरो बॅट्समन आसा.
आशिया कप 2022त रोहितान बरी खेळी केल्या. मात पाकिस्ताना आडचे मॅचींत ताणे पयल्या 18 बॉलांत 12 धांवड्यो केल्यो. हाँगकाँगा आड ताणे 13 बॉलांत 21 धावड्यो केल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
