टीम इंडिया 144 धांवड्यांनी मुखार

भांगरभूंय | प्रतिनिधी

येजमान भारतान बॉर्डर-गावस्कर ट्रॉफीचे पयले टॅस्टीच्या पयल्या डावांत ऑस्ट्रेलिये आड 144 धांवड्यांची आघाडी घेतल्या.

नागपूराच्या जामथा क्रिकेट स्टेडियमाचेर चालू आशिल्ले पांच दिसांचे मॅचीच्या दुसऱ्या दिसा भारतान पयल्या डावांत 7 विकेटी वगडावन 321 धांवड्यो केल्यात. मुखेली रोहित शर्मान सगल्यांत चड 120 धांवड्यो केल्यो. जाल्यार रवींद्र जडेजा (66) आनी अक्षर पटेल (52) अर्द शेंकड्यांची खेळी करीत खेळपट्टीचेर आसात.

ऑस्ट्रेलिये वतीन पदार्पण करपी टॉड मर्फीन 5 विकेटी घेतल्यो. मुखेली पॅट कमिन्सान आनी नॅथन लियॉनान दरेकी एक विकेट आपल्या नांवार केली. ऑस्ट्रेलियेचो पयलो डाव पयल्याच दिसा 177चेर सोंपिल्लो. जाल्यार भारतान पयल्या दिसाचो खेळ सोंप मेरेन 1 बाद 77 धांवड्यो केल्ल्यो.

काल दुसऱ्या दिसा पयरचे नाबाद बॅट्समन रोहित आनी आर आश्विन हांणी डाव मुखार व्हेलो. दुसऱ्या दिसाच्या पयल्या सत्राचेर भारतान आपलो शेक दवरलो. ह्या सत्रांत भारतान 74 धांवड्यो केल्यो आनी दोन विकेटी लेगीत वगडायल्यो. आर आश्विन आनी चेतेश्वर पुजारा तंबूंत परतले. सुरवातीच्यो तिनूय विकेटी मर्फीन घेतल्यो.

दिसाचें दुसरें सत्र दोनूय पंगडां खातीर मिश्र थारलें. ह्या सत्रांत 75 धांवड्यांची भर पडली. जाल्यार दोन विकेटी पडल्यो. ह्या सत्रांत भारतान 49 धांवड्यांची आघाडी घेतिल्ली. पूण, विराट कोहली आनी सुर्यकुमार यादव हांच्यो विकेटी वगडायल्यो. कोहली 12 आनी सुर्या 8 धांवड्यो करून बाद जालो.

मजगती, रोहित शर्मान टॅस्टींतलो 9वो शेंकडो थारलो. मुखेली म्हणून क्रिकेटीच्या तिनूय प्रकारांनी शेंकडो मारपी भारताचो पयलो बॅट्समन थारलो. संवसारांतल्या बॅट्समनां विशीं विचार केलो जाल्यार रोहिता पयलीं श्रीलंकेच्या तिलकरत्ने दिलशान, दक्षीण आफ्रिकेच्या फाफ ड्युप्लेसी आनी पाकिस्तानाच्या बाबर आजमान असो पराक्रम केला.

दिसाचें तिसरें सत्र भारताच्या बॅट्समनांनी गाजयलें. ह्या सत्रांत भारतान 95 धांवड्यो केल्यो. पूण, पंगडाक दोन धपके लेगीत बसले. दिसाचो खेळ सोंप मेरेन रवींद्र जडेजा आनी अक्षर पटेल हांणी आपआपलो अर्द शेंकडो पुर्ण केल्लो.