टिव्ही पत्रकारितेचेर बडी

भांगरभूंय | प्रतिनिधी

रतीय राष्ट्रीय खबरां चॅनलांक विरोधकांनी ‘गोदी मिडीया’ अशें नांव दिलां. म्हणजे कोणाचे तरी मांडयेर बसून तीं खबरो दितात. ‘गोद में बैठ के’, म्हणटात तशें. तर सत्ताधाऱ्यांचें मत, प्रधानमंत्री नरेंद्र मोदी हांच्या नांवाची कामीण जाल्ल्यान कांय प्रसारमाध्यमां कितेंय जालें जाल्यार मोदी हांचेर टिका करतात. आतां खरें आनी फट कितें तें चार राष्ट्रीय दिसाळीं आनी ‘फॅक्ट चेक’ वेबसायटी पळयतकच सगल्यांक कळटा. अर्थांत हें करपी भोव थोडे वाचक. चडश्या लोकांची दिशाभूल जाता. तांचे मदीं दुस्वास, ताण वाडटा…. आनी खंयच्याय खिणाक ही भितर खदखदपी ज्वालामुखी देशाक मारक थारूं येता!! पयरूच आशिया- पॅसिफीक प्रसारण उदरगत संस्थेची कार्यावळ जाली. तातूंत केंद्रीय म्हायती आनी प्रसारण मंत्री अनुराग ठाकूर हांणी मुखेल प्रवाहांतल्या प्रसार माध्यमांक डिजीटल माध्यमांचो न्हय, तर मुखेल खबरां चॅनलांचो चड धोको आसा, अशें सांगलें. खरी पत्रकारिता म्हणल्यार घडोवन बातम्यो सांगिनासतना, तिची सगली बाजू निःपक्षपातीपणान लोकां सामकार मांडप. बोंबलेच्या देठां पसून आड्डून विचारांचें ध्रुवीकरण करपी आनी फटीचो दिश्टीकोण पातळावपी लोकांक चर्चेक आपोवन चॅनल आपली विस्वासार्हताय वगडायतात. तिडक येता तितलेंच दाखोवचे परस ते पूर्ण बातमी कित्याक दाखयनात. खरी पत्रकारिता म्हणल्यार तथ्यां आनी सत्यां दाखोवप. सगल्यांक आपलें म्हणणें मांडपाक दिवप, अशेंय ठाकूर हांणी सांगलें. राष्ट्रीय चॅनलांच्या पत्रकारांनी हाचेर सिंहावलोकन करपाक जाय. तांचे वांगडाच मेंदू घाणाक दवरून सोशल मिडियाचेर मेळटा तें घालपी व्हाॅटसअॅप पदवीधरांनीय ठाकुरान म्हणलां ताचेर विचार करपाक जाय.
ठाकूर हांचे फाटोफाट, सर्वोच्च न्यायालयानूय खबरां चॅनलांचे आनी सरकाराचेय कान पिळ्ळे. प्रसार माध्यमां आड नेम करपाक जाय आनी सरकार हो क्षुल्लक मुद्दो अशें सांगून ओगी कित्याक रावलां, अशेंय न्यायालयान म्हणलां. कोरोनाक जातीयवादी थारावपी सोशल मिडिया पोस्ट, धर्मसंसदेंतलीं भाशणां, युपीएससी जिहाद अशा साबार कार्यावळी, दुस्वाशी चर्चां आड 11 याचिका दाखल जाल्यात. ताचेर काल सुनावणी जाली. 23 नोव्हेंबराक ती परतून जातली. खंयचेच चर्चेंत दुस्वास उक्तावपी भास कोणूच वापरचे नात हाचेर चर्चा चलोवपी निवेदक सहज नियंत्रण दवरूं शकता, अशें न्यायालयान मुखार म्हणलां.
अनुराग ठाकूर, सर्वोच्च न्यायालय वा हेर कोणूय म्हणटा, तातूंत तथ्य आसा. फाटल्या कांय वर्सां सावन भोवतेक खबरां चॅनल वेंचिक विशय घेवन भासाभास घडोवन हाडटना दिसतात. चड करून हे विशय अल्पसंख्यांक समाज, पाकिस्तान हांचे भोंवतणी घुंवतात. बरें हें एक दीस न्हय, तर सप्तकाचीं सप्तकां विशय वांटून घेतिल्ले वरी प्रक्षेपीत जातात. काल सगले चॅनल पाॅप्युलर फ्रंटाचेर उबे आशिल्ले. पक्षाचे म्हणयारे जाल्ले भशेन कांय पत्रकार उलयतात. थोडे आड्डून आड्डून वक्त्याक उलोवपाक दिनात वा आपलें मत ताच्या तोंडांतल्यान भायर काडपाचो यत्न करतात. उलोवपाक आपयिल्ल्या वक्त्या परस सूत्रसंचालन करपीच चड उलयता. 1990 च्या दशकांत सुयेश इल्यासी गुन्यांवकारी घडणुकांची कार्यावळ सादर करतना असो आड्डटालो. ताचो जागो आतां 3-4 पत्रकारांनी घेतला. शिगम्याक पसून जायना तितलो बोवाळ. कांय विदेशी खबरां चॅनलां वयल्यो चर्चा आनी आमच्या चॅलनां वयली भासाभास हांची तुळा केल्यार पळोवप्यांकूच सत्य कितें तें कळटलें. चॅनलांक दिसता, करोडांनी लोक चर्चा पळयतात. पूण कांय लोक सोडल्यार हेर कोण तांकां मीठ घालीना. बऱ्याच लोकांनी राष्ट्रीय खबरां चॅनल पळोवपूच सोडलां. प्रेक्षकांचो सर्व्हे घेतल्यार धपको दिवपी गजाली भायर सरतल्यो. राज्य पांवड्या वयले थळावे खबरां चॅनल अजून तटस्थ आसात, ही तातूंतले तातूंत बरी गजाल.
कायद्यांत दुस्वासपूर्ण भाशण आनी वावड्यो उडोवपा संबंदी स्पश्ट व्याख्या ना. नेमको हाचोच गैरफायदो कांय जाण घेवपाक लागल्यात. तेन्ना कायद्यांत दुरुस्त्यो करच्यो अशें याचिकादारांनी म्हणलां. त्यो जातल्यो काय ना, जाल्यार केन्ना जातल्यो, तें कोण सांगपाक शकना. इत्साशक्त आसल्यार ‘आठ’ दिसां भितर त्यो जावं येतात. राष्ट्रीय चॅनलां वांगडा सोशल मिडियाचेर कमेंट करतना व्हांवपी लोकांचेरुय कारवाय जातली? चार फावटी धावेंत नापास जाल्ले पसून डाॅ. मनमोहन सिंग सारक्या अर्थतज्ञांक अर्थवेवस्था शिकयतात. नेहरूंक गाळी संवतात. वास्तविक हे खरे मनीस काय कोणा आयटी सेलान तयार केल्ल्यो बोगस आयडी तें कळपाक मार्ग ना.
सर्वोच्च न्यायालयान इबाडिल्ले टिव्ही पत्रकारितेचेर बडी मारल्याच, वयर केंद्रीय म्हायती मंत्र्यान चॅनलांचे कान तोंपल्यात. आतां फुडलें पावल सरकारान उखलपाचें. पळोवया.