भांगरभूंय | प्रतिनिधी
गोवा डेरीक 10 लाखां परस अदीक रुपयांचें लुकसाण
भांगरभूंय । प्रतिनिधी
फोंडें: उसगांवच्या गोवा डेरीच्या पशुखाद्य प्रकल्पांत बुधवारा सांजेच्या 6 वरांच्या सुमाराक मोलायसीस टांकये लागसारच्या वॉल्वाचो स्फोट जाल्ल्यान सुमार 40 टन मोलायसीस व्हावून वचपाचो प्रकार घडलो. ताका लागून गोवा डेरीक सुमार 10 लाख रुपयां परस अदीक लुकसाण जाल्ल्याचो अदमास आसा.
देड वर्सां आदीं प्रशासकाचे कारकिर्दींत टांकयेचे दुरुस्ती वेळार व्हड भ्रश्टाचार जाल्ल्याचो गोवा डेरीचे अध्यक्ष राजेश फळदेसाय हांणी दावो केला.
बुधवारा सांजेच्या 5 वरांच्या सुमाराक सगळे कर्मचारी प्रकल्प बंद करून आपल्या घरा गेल्ले. ते उपरांत सांजेच्या 6 वरांच्या सुमाराक एके टांकयेच्या व्हॉल्वाचो स्फोट जालो आनी टांकयेंतलें 40 टन मोलायसीस व्हावून गेलें.
प्रकल्पांत आशील्ल्या सुरक्षा रक्षकांनी हे संबंदीची म्हायती अधिकाऱ्यांक दिली. बिरेस्तारा सकाळीं अध्यक्ष राजेश फळदेसाय हांणी पशुखाद्य प्रकल्पांत वचून पळोवणी केली. ह्या वेळार पत्रकारां कडेन उलयतना फळदेसाय हांणी सांगलें, प्रशासक कारकिर्दींत अध्यक्ष आशिल्ले दुर्गेश शिरोडकार हांणी 3 टांकयां लागसारच्या वाहिन्यांचे दुरुस्ती खातीर 8 लाख रुपयांची निविदा काडिल्ली. ते उपरांत 2 टांकया लागसारच्या वाहिन्यांचे दुरुस्ती खातीर 14 लाख रुपया खर्च केल्ले. दुरुस्तीच्या कामांत सकयल्या पांवड्या वयलें साहित्य वापरिल्ल्यान बुधवारा वॉल्वाचो स्फोट जालो. हे संबंदी समितीची निवड करून पुराय चवकशी करतले.
आरोपांत मातूय तथ्य नाः शिरोडकार
राजेश फळदेसया हांणी केल्ल्या आरोपांत मातूय तथ्य ना. ताचे कडेन पुरावे आसात जाल्यार तांणी ते सादर करचे वा पदा वयल्यान खाला देंवचो. मोलायसीस 3 टांकयां लागसारच्या वाहिन्यांचे दुरुस्ती खातीर 24 लाख रुपयांची निविदा काडिल्ली. पूण खर्च वाटावपा खातीर त्या वेळार 2 टांकयांचे दुरुस्ती खातीर 14 लाख रुपयां खर्च करपाचो निर्णय जाल्लो, अशें आदले अध्यक्ष दुर्गेश शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
