झिम्बाब्वे भोंवडीः लक्ष्मण भारताचो मुख्य प्रशिक्षक

भांगरभूंय | प्रतिनिधी

राष्ट्रीय क्रिकेट अकादमीचे अध्यक्ष व्ही व्ही एस लक्ष्मण हो झिम्बाब्वेचे भोंवडेर वचपी भारताच्या पंगडाचो कार्यवाहक मुख्य प्रशिक्षक आसतलो अशी म्हायती भारतीय क्रिकेट नियामक मंडळाचे (बीसीसीआय) जय शाह हांणी दिली.

झिम्बाब्वे आडची वन डे माळ 22 ऑगस्टाक सोंपतली आनी 23 ऑगस्टाक भारताचो पंगड आशिया करंड क्रिकेट सर्तींत वांटो घेवपाक यूएईक वचपाक भायर सरतलो.

ह्या दोनूय सर्ती मदीं खूब उणो वेळ आसा. ताका लागून सदचो मुख्य प्रशिक्षक राहुल द्रविडाच्या बदला लक्ष्मण झिम्बाब्वे वतलो. आशिया करंड टी-20 सर्ती खातीर वेंचिल्ल्या पंगडांतले फक्त लोकेश राहुल आनी दीपक हुड्डा झिम्बाब्वेचे वचपी पंगडांत आसात.

झिम्बाब्वे आडच्यो वन डे मॅची 18, 20 आनी 22 ऑगस्टाक हरारेंत जातल्यो. राहुल आनी हुड्डा हरारेंतल्यान युएईक वतले.

मुख्य पंगड खंयचे भोंवडेर आसता त्या वेळार दुसऱ्या दर्जाच्या पंगडा वांगडा वा ए पंगडा वांगडा सदांच राष्ट्रीय क्रिकेट अकादमीचो अध्यक्ष वांगडा आसता ही बीसीसीआयची परंपरा आसा.