भांगरभूंय | प्रतिनिधी
पणजीः ज्येश्ठ नागरिकांक भलायकी विम्याचो सगळ्यां परस चड लाव दिवपी राज्यांचे वळेरेंत गोंय सातव्या नंबराचेर आसा. गोंयांतल्या 41.8 टक्के ज्येश्ठ नागरिकांक केंद्र आनी राज्य सरकाराच्या विम्याचें कवच मेळ्ळां. हालींच उजवाडाक आयिल्ल्या इंडिया एजींग अहवालांतल्यान ही म्हायती मुखार आयल्या.
60 वर्सां वयल्या ज्येश्ठ नागरिकांक भलायकी संबंदांत मेळपी विम्याचें देशभरांत सर्वेक्षण करून हो अहवाल उजवाडायला. ज्येश्ठ नागरिकांक केंद्र सरकाराचो भलायकी विमो, राज्य सरकाराचो विमो, राज्य कर्मचारी भलायकी विमो तशेंच राष्ट्रीय भलायकी सेवा येवजणे खाला मेळपी विमो, अश्या विवीध तरेच्या विम्यांचो लाव मेळटा. वाडटे विराये वांगडा विवीध दुयेंसां उप्रासल्या उपरांत तांचे वयल्या उपचारांत सवलत मेळची, ह्या उद्देशान केंद्र आनी राज्य सरकारां 60 वर्सां वयल्या लोकांक अशे तरेचो विमो दितात. अश्या भलायकी विम्यांचो गोंयांतल्या 41.8 टक्के ज्येश्ठ नागरिकांनी आतां मेरेन लाव घेतला, अशें ह्या अहवालांत म्हणलां.
जाण्ट्यांच्या भलायकी विम्यांचें सर्वेक्षण ग्रामीण आनी शार अश्या दोनूय कडेन केल्लें. तातूंत देशाच्या ग्रामीण वाठारांतल्या 18.6 आनी शार वाठारांतल्या 17.3 टक्के ज्येश्ठ नागरीक भलायकी विम्याचो लाव घेतात. 60 ते 69 पिराय गटांतले 20.4 टक्के, 70 ते 79 पिराय गटांतले 15.8 टक्के आनी 80 आनी ताचे वयर पिराय आशिल्ल्या 13.5 टक्के ज्येश्ठ नागरिकांक भलायकी विम्याचें कवच मेळ्ळां, अशेंय अहवालांत नमूद केलां.
मजगतीं, गोंयांतल्या ज्येश्ठ नागरिकांच्या उपचारा खातीर राज्य सरकारान भलायकी विम्या सयत हेर खूबश्यो येवजण्यो चालीक लायल्यात. ताचो व्हड प्रमाणांत फायदो ज्येश्ठ नागरिकांक मेळटा, अशें दिसून आयलां.
सगळ्यांत चड विम्याचो लाव घेवपी 10 राज्यां
मिझोरम (66.5 टक्के), ओडिशा (58.9 टक्के), दादरा नगरहवेली (57.7 टक्के), छत्तीसगड (46.6 टक्के), मेघालय (46.3 टक्के), आसाम (45.7 टक्के), गोंय (41.8 टक्के), राजस्थान (39.6 टक्के), केरळ (38.1 टक्के), आंध्रप्रदेश (36 टक्के)
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
