जोकोवीच क्वॉर्टरफायनलींत

भांगरभूंय | प्रतिनिधी

सर्बियाच्या नोवाक जोकोवीचान अमेरिकन ओपनाचे क्वॉर्टरफायनलींत सुवात मेळयली. ताणें 13वे खेपे क्वॉर्टरफायनलींत सुवात निश्चीत केली. ह्या जैता सयत जोकोवीचान आदले दिग्गज खेळगडे रोजर फॅडरर आनी आंद्रे आगासी हांच्या विक्रमा कडेन बरोबरी केली. मजगतीं, बायलांच्या एकोड्या गटांत सध्याची वस्ताद इगा स्वियातेक हारली.

23 ग्रॅण्ड स्लॅम किताब जिखपी जोकोवीचान चवथे फेरयेंत संवसारीक क्रमवारींत 105वे सुवातेर आशिल्ल्या क्रॉएशियाच्या बोर्ना गोजोक 6-2, 7-5 आनी 76-4 अशा सरळ सेटांनी हारयलो.

तीन खेपेचो अमेरिकन ओपन वस्ताद जोकोवीच क्वॉर्टरफायनलींत अमेरिकेच्या टेलर फ्रिट्जा आड खेळटलो. फ्रिट्ज पयले खेपे अमेरिकन ओपनाचे क्वॉर्टरफायनलींत सुवात मेळयली.

बायलांच्या एकोड्या गटांत पयल्या क्रमांकाचे स्वियातेकाक हारीचो धपको बसलो. प्री-क्वॉर्टरफायनलींत तिका 21वे सुवाते वयले जेलेना ओस्टापेंको कडल्यान 6-3, 3-6 आनी 1-6 अशा तीन सेटांनी हार घेवची पडली. एक वर आनी 48 मिनटां मेरेन चलिल्ले मॅचींत पयलो सेट हारल्या उपरांत ओस्टापेंकोन जबरदस्त पुनरागमन केलें. ओस्टापेंको आयज जावपी क्वॉर्टरफायनलींत अमेरिकेचे कोको गॉफा आड खेळटली.

फॅडरर आनी आगासी हांणी कारकिर्दींत 13-13 खेपे अमेरिकन ओपनाचे क्वॉर्टरफायनलींत सुवात मेळयिल्ली. तांच्या ह्या विक्रमा कडेन जोकोवीचान बरोबरी सादली. फॅडररान पोरूं आनी आगासीन 2006त निवृत्ती घेतल्या, ताका लागून तांचो हो विक्रम मोडपाची संद फुडारांत जोकोवीचा कडेन आसा.