भांगरभूंय | प्रतिनिधी
सर्बियाच्या नोवाक जोकोवीचान अमेरिकन ओपन ग्रॅण्ड स्लॅम सर्तीचो किताब जिखलो. हांगाच्या मार्गरेट कोर्टाचेर जाल्ले फायनलींत ताणें रशियेच्या डॅनील मेदवेदेवाक हारोवन 24वो ग्रॅण्ड स्लॅम किताब जिखलो. उमळशीक वाडोवपी मॅचींत 36 वर्सांप पिरायेच्या जोकोवीचान 6-3, 7-6 (7-5) आनी 6-3 अशा फरकान जैत जोडलें.
जोकोवीचान पयलो सेट 6-3 असो सहज जिखलो. पूण, दुसऱ्या सेटांत मात दोनूय खेळगड्यां मदीं खर संघर्श पळोवपाक मेळ्ळो. दुसरो सेट वट्ट एक वर आनी 44 मिनटां मेरेन चल्लो. अखेरेक जोकोवीचान हो सेट 7-6 फरकान जिखलो. जोकोवीचान तिसरो सोट 6-3 अशा फरकान सहज जिखून विक्रमी किताब जिखलो.
संवसारीक क्रमवारींत दुसरे सुवातेर आशिल्ल्या जोकोवीचान चवथे खेपे अमेरिकन ओपनाचो किताब जिखलो. ह्या वर्साचे सुरवातीक ताणें स्पेनाच्या राफायल नादालाचो 22 ग्रॅण्ड स्लॅम किताबाचो विक्रम मोडिल्लो. अंदूं चारांतले तीन ग्रॅण्ड स्लॅम किताब जिखल्यात. विम्बल्डनांत ताका उपवस्तादपणाचेर समाधान मानचें पडिल्लें.
जोकोवीच अजून मेरेन 36 ग्रॅण्ड स्लॅम सर्तीचे फायनलींत खेळ्ळा. तातूंतल्यो 24 फायनली जिखल्यात. 10 खेपे ऑस्ट्रेलियन ओपन, सात खेपे विम्बल्डन सर्त, तीन खेपे फ्रॅंच ओपन आनी चार खेपे अमेरिकन ओपन जिखल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
