भांगरभूंय | प्रतिनिधी
विश्वास गावडेः सांगें विकास मंचाची जाहीर बसका
भांगरभूंय । प्रतिनिधी
सांगें: जैव संवेदनशील नियोजीत वाठार हो कश्टकरी लोकांचो. सरकारान तो गरीब लोकांच्या माथ्याचेर थापचो न्हय. हो वाठार गरीब लोकांक खूब त्रासाचो जातलो. ताका लागून सगळयांनी संघटीत रावून हाका विरोध करपाची गरज आसा. कर्नाटक, महाराष्ट्रांत अशा वाठाराक विरोध आसा. माणकुल्या गोंयांतूय ताची गरज ना, अशें गोमंतक गौड मराठा समाजाचे अध्यक्ष विश्वास गावडे हांणी सांगलें.
13 नोव्हेंबराक कुर्डीच्या श्री गणेश उत्सव सभा मंडपांत सांगें विकास मंच समितीन जाहीर बसकेचें आयोजन केल्लें. ह्या वेळार गावडे उलयताले. तांचे वांगडा माचयेर जिल्हो पंचायत वांगडी सुरेश केपेंकार, नेत्रावळीचे सरपंच बुंदो वरक, मंचाचे अध्यक्ष ॲड. आनंद गांवकार, अनील काकोडकार आनी हेर मानेस्त हाजीर आशिल्ले.
वेगवेगळे तरेचे वाठार तयार करून लोकांक सतावपाचे प्रकार 1999 सावन सुरू जाल्यात. 1999 त जेन्ना नेत्रावळींत अभयारण्य सुरू केलें त्या वेळार लोकांनी ही गजाल फकाणाचेर व्हेल्ली, पूण आयज ताचो वायट परिणाम दिसता. तेच तरेन जैव संवेदनशील वाठाराचे वायट परिणाम 10 वर्सां उपरांत कळटले. ताका लागून कांय जागृत लोक एकठांय येवन ह्या वाठाराक विरोध करतात, पूण कांय लोक सरकाराक भियेवन फाटीं ओडटात. जे लोक फाटीं ओडटात तेच हे मोहिमेक आडखळ हाडटात. हो वाठार 6 मतदारसंघांनी येता. ताका लागून त्या मतदारसंघांतल्या सवूय आमदारांनी ह्या वाठाराक विरोध करपाची गरज आसा, अशेंय गावडे हांणी सांगलें.
ॲड. आनंद गांवकार हांणी सांगलें, 1999 सावन सरकार एकेक प्रस्ताव लोकांचेर थापता आनी लोकांक त्रास करता. ह्या वाठारा विशीं सरकारान लोकांक समजून सांगूंक ना आनी लोकांनीय समजून घेवंक ना. ताका लागून आमी जागृताय करून सरकाराक समजावपाची गरज आसा. एकदां हो विशय हाताभायर गेले उपरांत ताचेर उपाय काडपाक जावचो ना. आयज खाजगी जमनी सरकारान आपल्या ताब्यांत घेवन खाजगीं रानां तयार केल्यांत. त्या रानांतलें एकूय झाड गरजे खातीर मारपाक मेळना आनी त्या वाठारांत बांदकाम लेगीत करपाक मेळना. आमच्याच गांवांत, आमचेच जमनीचेर आमचो हक्क उरूंक ना. थळावे आमदार तशेंच समाज कल्याण मंत्री सुभाष फळदेसाय हांणी हो विशय लावन धरपाची गरज आसा. आयचे बसकेक तांकां मुद्दाम आपयिल्ले, पूण ते कित्या खातीर येवंक ना, तें खबर ना. सरकार जे मेरेन हो जैव संवेदनशील वाठार रद्द करिना, ते मेरेन आमी ओगी बसचे नात, अशी शिटकावणी ॲड. गांवकार हांणी दिली. ह्या वेळार चंदा वेळीप आनी सुरेश काकोडकार हांणी विचार मांडले. हे बसकेक सुमार 400 जाण हाजीर राविल्ले.
फुडारांत सांगेंकारांक त्रास जातलोः केपेंकार
सुरेश केपेंकार हांणी सांगलें, जैव संवेदनशील वाठार हो विशय खऱ्यांनीच संवेदनशील आसा, पूण बारीकसाणीन अभ्यास केल्यार तो सांग्यार लागू जायना. ताचो त्रास सगळ्याच सांगेंकारांक जावपाक शकता. लोकांचो फुडार पळोवन सवूय आमदारांनी एकठांय येवन हो विशय सोडोवपाची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
