भांगरभूंय | प्रतिनिधी
99 गांव अधिसुचोवणेंतल्यान वगळचे, केंद्रा कडेन मागणी
भांगरभूंय I प्रतिनिधी
पणजी : अस्तंत घांटांत येवपी राज्यांतले 19 गांव पर्यावरण नदरेन संवेदनशील म्हूण जाहीर करपाक राज्याचो विरोध आसा. पर्यावरणीय नदरेन संवेदनशील वाठार अधिसुचोवणेंतल्यान गोंयांतले 99 गांव वगळचे, अशी मागणी केंद्रा कडेन केल्या. रानां मंत्री तशेंच वाळपयचे आमदार विश्वजीत राणे हांणी ही म्हायती दिली.
जैव संवेदनशील वाठार अधिसुचोवणेक गोंया सयत कर्नाटकाचो लेगीत विरोध आसा. केंद्रीय मंत्री भुपेंद्र यादव हांका आपणें इमेल करून थळाव्यांचो विरोध आशिल्ल्याचे कळयतलो. तांकां पत्र धाडटलो. राना खात्याचे म्हासंचालक सी. पी. गोयल हांचे कडेन आपणें चर्चा केल्या. राना खात्याचो मंत्री ह्या नात्यान विरोध आशिल्ल्याचे कळयतलो. ते भायर मुख्यमंत्री डॉ. प्रमोद सावंत हे लेगीत बाजू मांडटले. गोंयांत राना वाठार समाधानकारक आसा. हाका लागून 99 गांव जैव संवेदनशील वाठार म्हूण अधिसुचीत जावपाची गरज ना, अशें मंत्री विश्वजीत राणे हांणी सांगलें.
केंद्रीय रानां आनी पर्यावरण मंत्रालयान जैव संवेदनशील वाठार अधिसुचोवणीचो मसुदो जाहीर केला. हो मसुदो जाहीर जाले उपरांत ग्रामस्थांनी विरोध केला. हांतूंत सत्तरी, सांगें, धारबांदोडें आनी काणकोणच्या गांवांचो आस्पाव आसा. हे गांव जैवसंवेदनशील वाठारांत आयले जाल्यार ग्रामस्थ तशेंच उदरगतीचेर निर्बंध येतले. हाका ग्रामस्थांचो विरोध आसाच. आतां मंत्री विश्वजीत राणे हांणी लेगीत विरोध केला.
वट्ट 56,825 चाै. किमि. जमीन संदेवनशील
गोंयां सयत गुजरात, महाराष्ट्र, कर्नाटक, केरळ आनी तमीळनाडू ह्या राज्यांच्या वाठारांचो आस्पाव जैव संवेदनशील वाठारांत आसा. स राज्यांतली मेळून 56,825 चौखण किलोमीटर जमीन पर्यावरणीय नदरेन संवेदनशील म्हूण मसुद्यांत आसात.
सरकार योग्य तरेन प्रस्न सोडयतलेः विश्वजीत राणे
शारांतल्या लोकांक जैव संवेदनशील वाठारा विशीं उलोवपाक सोंपे आसता. गांवांतल्या लोकांक कितें त्रास जाता, ते म्हाका खबर आसा. लोकांनी भिरांत बाळगुपाचें कारण ना. राज्य सरकार योग्य तरेन हो प्रस्न सोडयतलो, अशें विश्वजीत राणे हांणी म्हणलें. मजगतीं, वाडी कुर्डीचे जाल्ले ग्रामसभेंत ग्रामस्थांनी जैव संवेदनशील वाठाराक आक्षेप घेतलो. कुर्डी गांव जैवसंवेदशनील वाठारांत घातले जाल्यार आंदोलनाची शिटकावणी ग्रामस्थांनी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
