जैतिवंत जिविताची चावी

भांगरभूंय | प्रतिनिधी

जैतिवंत जातलो जाल्यार तुजे निर्णय सारके आसूंक जाय आनी ते योग्य वेळार घेंवक जाय. सद्यां तुजे येश तुज्या शाण्या निवडीचेर निंबून आसा. मनीस हो भाग्यवान प्राणी. कितें करचें आनी कितें करचें न्हय हें निवडपाची ताका उपजत मेकळीक आसा. हेर खंयचेच जिवजातीक हो वर ना. शींव म्हणूक शकना की शिकार करुन करुन आपणाक पुरो जालां, देखून आपूण आतां करड खाता म्हूण. गायेक तण खावन खावन वाज आयलो म्हणू ती चिकन खावंक शकना. पूण, तुमच्या मुखार घे म्हूण तरेकवार पर्याय आसात. तुवें चुकनासतना योग्य ती निवड करुक जाय. तूं कितें पसंत करतलो, जलेबी काय पालक भाजी? तूं सोंशीक जातलो काय राग ओंकतलो? ह्या असल्या निवडींतल्यान तूं तुजो फुडार घडयता. जायते फावट तूं खिणयाळ्यां सुखाक भाळटा आनी मागीर मुखावेल्या दुख्खांची तजवीज करता. जें सुरवेक कश्टदिणे आसता तेंच तुका फुडाराक सासणीक सूख दिता. हें जिवीतातले एक सत जावन आसा.
सारकी आनी बरी निवड करपाक मजत जावची म्हूण देवान आमकां बुद्द दिल्या. पूण, आमी चडशे जाण आमचे हे बुद्दीचो वापर करीनात. तिचो विकासूय करीनात. आमी अपरिपक्व बुद्दीन निवड करतात आनी फोंडान पडटात. तुमी घेतिल्ल्या एखादे चुकीचे निवडीची याद करुन पळयतात. कित्याक लागून तुमी ती केल्ली? निखट्या आवेगान वा भुल्लशेपणान? आतां तुमी केल्ले एखादे बरे निवडीची याद करात. हो दुसरो निर्णय घेवपाक तुजे बुद्दीन तुका मजत केल्ली. तुवें आरतें परतें येवजिल्लें. लाव- लुकसाणेचो सारको बरो हिशोब केल्लो आनी उपरांतूच ती निवड केल्ली म्हणपाचें तुमच्या लक्षांत येतलें.
भुरग्यांची बुद्द सारकी विकसीत जाल्ली नासता. हे खातीर चुकीचे निवडीचे परिणाम तांकां भोगचे पडू नये म्हूण कांय निर्णय घेवपाक तांकां मनाय केल्ली आसता. हेच पासत वाहनां चलोवपाक वा सोरो पिवपाक कायद्यान पिरायेची अट घाल्ली आसा. पूण, जेन्ना शाणे- सुरते मनीस आपणाली बुद्द घाणाक दवरुन निखट्या मनाच्या लहरी प्रमाण निर्णय घेतात तेन्ना तांका कितें म्हूण म्हणपाचें?
तूं चुकीच्यो निवडी कित्याक म्हूण करता? तुज्या मनाच्या लहरीपणाक लागून तूं तशें करता. कित्याय- कितें करता. उठून व्यायाम करपा वाट्याचे तूं न्हिदून रावप पसंत करता. तूं दूबळो जाता. तूं पियेता वा घुंवळे वखदांचें सेवन करता. कित्याक तर, तुजे इश्ट तशें करतात वा तूं कळपी मानसिकतायेच्या (herd mentality) भकीक पडटा. सगळे जाण भौतीक सुखां फाटल्यान धांवतात, देखून तूंय बीन तांच्या फाटल्यान धांवता. घडये तुजी एखादी खर इत्सा आसता जी तुजे बुद्दीक बंदीस्त दवरता आनी तुज्या मनाच्या इत्से भायर तिका येवजुकूच दिना. एक गाडी आसता. तिचें मोल तुका परवडपा सारकें आसना. तरीय पूण तुका खरसाणीन ती विकती घेयन दिसता. मागीर तुजें मन तुज्या चुकीच्या निर्णयाचे समर्थन करपा खातीर तुजे बुद्दीचेर चेपण हाडटा. तिचेर बळजबरी करता.
हाचेर उपाय म्हणजे कसलीय निवड करचे पयलीं मात्सो थार धर. सारकें येवजी, तुजे बुद्दीची मसलत घे आनी मागीरुच निर्णय घे. सुरवेक हें कटकटीचे कशें दिसतलें, पूण उपरांत सवय जातकूच आंगवळणीं पडटलें. म्हत्वाचे निर्णय घेवच्या वगतार ताकतीक करु नाका. वेळ घे. एखाद्या जाणकाराची बुद्द घे. पुरविल्ल्या भारतात राजांच्या दरबारांनी गिन्यानी आसताले. आनी म्हत्वाच्या प्रस्नांचेर तांचो सल्लो घेताले. हाका लागून निर्णय समजिकायेचे आनी तर्काक धरुन आसताले. तुज्या भावनांचीय कदर कर. तुका जर सुटयेर वचूक जाय जाल्यार ह्या गजालीचो फावो तितलो विचार कर आनी तुजे बुद्दीन जर मान्यताय दिली जाल्यार मागीर तुजी इत्सा पुरी कर.
सगळ्यान बरी निवड ही मोलांचेर (velues) आदारीत आसची. सकल्ल्या मोलां परस उंचेलीं – श्रेश्ठ मोलां वेंच. खिणयाळ्यां म्हळ्यार संवसारीक मोलां परस सासणीक मोलां वेंच. भौतीक मोलां परस आध्यात्मीक मोलां वेंच. तुजे समर्थ बुद्दीन उत्तम निवड कर. मोलांचेर आदारिल्ल्यो निवडी तुका सुखी करतल्यो. आनी जेन्ना तूं आध्यात्म वेंचतलो तेन्ना तूं तुजी आध्यात्मीक नदरेन उदरगत सादतलो.
(मूळ लेखिका- जया रोव)

प्रदीप लवंदे
9923292022