भांगरभूंय | प्रतिनिधी
संवसारीक वन डे क्रिकेट सर्तींत आयज येजमान भारत आनी इंग्लंड ह्या पंगडां मदीं हांगाच्या इकाना क्रिकेट स्टेडियमाचेर जातली. फकत भारताचोच पंगड सर्तींत अजून मेरेन एकूय मॅच हारूंक ना. ताणें पांचांतल्यो पांचूय मॅची जिखल्यात. जैताची ही धांव आयचे मॅचींत लेगीत कायम राखपाचो ताचो यत्न आसतलो. दुसरे वटे सेमी फायनलींतली आस्त कायम राखपा खातीर इंग्लंडाक खंयचेय परिस्थितींत ही मॅच जिखची पडटली. सध्याचो वस्ताद इंग्लंडान अंदूंचे सर्तींत निर्शेणी हाडपी प्रदर्शन केलां. आयचे मॅची वरवीं तरी शेणिल्लो आत्मविस्वास मेळोवपाचो ताचो यत्न आसतलो. पूण, उत्कृश्ट फॉर्मांत आशिल्ल्या भारताक हारोवपाक ताका खर यत्न करचे पडटले. ते खातीर ताका धांवड्यांचो पावस घालपी रोहित शर्मा आनी विराट कोहली हांकां आडावपाचे पडटले.
इंग्लंडा आड विराट कोहलीचें प्रदर्शन अजून मेरेन सरासरीचेंच जालां. पूण, बदिल्ले परिस्थितींत कोहलीक आडावप इंग्लंडाच्या बॉलरां खातीर सोंपें काम आसचें ना. कोहली शेंकडो नोंदोवन आदलो म्हान बॅट्समन मास्टर ब्लास्टर सचिन तेंडुलकराच्या विक्रमा कडेन बरोबरी करपाक इत्सूक आसतलो. इकाना स्टेडीयमाची खेळपट्टी अजून मेरेन खेळिल्ल्या मॅचींनी बॅट्समनांक मजत करपी थारल्या. ताका लागून आयचे मॅचींत लेगीत धांवड्यांचो पावस पडपाक शकता.
फाटले मॅचींत भारताच्या जैतांत म्हत्वाची भुमिका वठोवपी मोहम्मद शमी आनी इंग्लंडा आड बरें प्रदर्शन करपी आर आश्विन हांकां निमाण्या इकरांत सुवात मेळुये. तशेंच थळावो स्पिनर कुलदीप यादव लेगीत म्हत्वाची भुमिका वठोवपाक शकता. सिक्सर किंग रोहित शर्माक आडोवपा खातीर लेगीत इंग्लंडाच्या बॉलरांक खाशेली रणनिती आपणावपाची पडटली.
आक्रमक बॅटींग करून प्रतिस्पर्धी पंगडाच्या बॉलरांचेर चेपण हाडपाची ताची रणनिती अजून मेरेन येसस्वी थारल्या. रोहिताचे हे रणनितीक लागून मदले फळयेंतल्या बॅट्समनांक मेकळेपणान खेळपाची संद मेळ्ळ्या. पूण अंदूंचे सर्तींत भारताचे मदले फळयेंतल्या बॅट्समनांचो कस लागूंक ना.
सेगीत हारपी इंग्लंड केन्नाय पुनरागमन करपाक शकता हें भारताक बेस बरें खबर आसा. ताका लागून इंग्लंडाक उणो लेखपाची चूक भारत करचो ना.
इंग्लंडाचें प्रदर्शन कांय प्रमाणांत ताच्या जो रुटाचेर निंबून आसतलें. भारतीय उपखंडांतल्या सावकाश खेळपट्टींचेर जो रुटान बरी बॅटींग केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
