भांगरभूंय | प्रतिनिधी
खबरां संस्था
बर्मिंगहॅमः राष्ट्रकुल खेळां सर्तींत भारतीय वेटलिफ्टरांनी चमकदार कामगिरी सुरू दवोरल्या. सर्तीच्या तिसऱ्या दिसा वेटलिफ्टर जेरेमी लालरिंन्नुगान 67 किलो वजनाच्या गटांत वट्ट 300 किलो वजन उखलून भांगरा पदक मेळयलें. 2022 चे राष्ट्रकुल सर्तींत भारताचें हें दुसरें भांगरा पदक थारलां. जेरेमीन स्नॅच प्रकारांत 140 किलो वंजन उखलून नवो राष्ट्रकुल विक्रमक केलो.
19 वर्सा पिरायेच्या जेरेेमीन क्लीन आनी जर्क प्रकारांत 160 किलो वजन उखळून वट्ट 300 किलो ग्रॅम वजन उखल्लें. राष्ट्रकुल खेळां सर्तींत हो लेगीन नवो विक्रम आसा. 165 किलो वजन उखोलपाच्या निमण्या यत्नांत निमाणे जेरेमीक दुखापत जाल्ल्यान तो निमणो यत्न पुराय करपाक शकलो ना तरीय ताणे भांगरा पदकाचे आपलें नांव कोरातीत करपाच येश मेळयलें.
मिझोरामांतल्या आयझोल हांगा राबित्याक आशिल्ल्या जेरेमीचें राष्ट्रकुल खेळां सर्तींतलें हें पयलेंच वर्स आसा. ताणे 2018च्या युवा ऑलिम्पींक सर्तीत 62 किलो वजनाच्या गटांत भांगरा पदक जिखिल्लें. पोरू जाल्ल्या राष्ट्रकुल चॅम्पियनशीप सर्तींत ताणे 67 वजनाच्या गटांत भांगरा पदक जिखिल्लें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
