भांगरभूंय | प्रतिनिधी
तिनूय जेटींचें मुखेल दार केलें बंद; दोन लाख भरांत वेवसाय करात: नुस्तेमार खातें
पणजी: नुस्तेमारी खात्यान जेटीर परवानो नासतना कांय वेवसायीक नुस्त्याचो वेवसाय करीत आशिल्ल्यान काल (बुधवारा) तिनूय जेटींचें मुखेलदार बंद केलें. नुस्तेमार खात्यान जेटीर वेवसाय करपाचो आसत जाल्यार वर्साचे 2 लाख रुपया भरात आनी वेवसायीक म्हूण नोंदणी करून घेयात अशी शिटकावणी नुस्तेमार खात्यान दिल्ली.
नुस्तेमार वेवसायिकांनी हाका विरोध करून बुधवारा नुस्तेमार खात्याच्या संचालकांची भेट घेवन बंद केल्ल्यो जेटी उक्त्यो करपाची मागणी केली. हे विशीं नुस्तेमार खात्याच्यो संचालिका शर्मिला मोंतेरो हांणी 10 दिसां खातीर हो निर्णय स्थगीत दवरचो हे तांचे मागणेक मान्यताय दिल्या. 10 दिसां भितर नुस्तें वेवसायिकांक नोंदणीकृत करचें पडटलें.
नुस्तें सहकारी सोसायट्यो मनमानी कारभारत करतात. तशेंच नुस्तें वेवसायीक बेकायदो रितीन कब्जो करीत आशिल्ल्यान हो निर्णय घेतला. सगल्या वेवसायिकांनी कायदेशीर नुस्तेमार खात्या कडेन नोंदणी करून शुल्क भरले बगर तांकां जेटींत प्रवेश दिवचे नात. नुस्तेमार खातें नुस्तें वेवसायिकांक सगलें अनुदान दिता, पूण नुस्तेमार खात्याक तांचे कडल्यान कांयच मेळना. नुस्तें वेवसायिकां कडल्यान खात्याक कर मेळना. हो मोटो भ्रश्टाचार जेटीर सुरू आसा. आतां 40 कोटी खर्च करून नुस्त्या मार्केट बांदतात. हे सुवातेर नुस्तें वेवसायिकांनी कायदेशीर नोंदणी केले बगर कोणाकूच परवानगी दिवचे नात अशें नुस्तेमार मंत्री नीळकंठ हळर्णकार हांणी म्हणलें.
जेटीर आशिल्ल्या ह्या वेवसायिकांक सोसायट्यो सहकार्य करतात. जेटीर न्हंयदेग नियंत्रण विभागाचे तशेंच नुस्तेमार खात्याचे परवानगे बगर आपले कचेरेचो विस्तार केला. हे सुवातेर आपल्याक जाय तसो नुस्तें खरेदी, विक्रीचो वेवसाय सुरू आसा. नुस्तेमार खात्याक खंयच विस्वासांत घेनात. हे खातीर खर निर्णय घेतले. जें कायदेशीर जातलें तें करतले अशेंय नीळकंठ हळर्णकार हांणी सांगलें.
बुधवारा मालीम, कुटबण आनी वास्को ह्या तिनूय जेटींच्या मुखेल दाराचेर कुलप लायिल्लें. ताका लागून बोट धनी, नुस्तें वेवसायिकांनी नुस्तेमार खात्याचे कचेरेंत वचून संचालकांची भेट घेतली. थळावे नुस्तेमार वेवसायिकांक विस्वासांत घेनासतना खात्यान जेटी बंद केल्ल्यान जेटीर आशिल्लें नुस्तें कुसपाची शक्यताय आसा. हाचो विचार मंत्र्यांनी करचो अशें अखील गोंय नुस्तेमार बोट संघटणेचे अध्यक्ष जुझे फिलीप डिसोझा हांणी सांगलें. ह्या वेळार तांचे सयत आपाचे वेळ्ळी मतदारसंघाचे आमदार क्रुझ सिल्वा तशेंच हेर हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
