भांगरभूंय | प्रतिनिधी
ओव्हरटेक करपाच्या नादांत पुलाचो कठडो मोडून मोटार पडली जुवारी न्हंयेंत
भांगरभूंय I प्रतिनिधी
पणजी : बुधवारा मध्यान रातीं एक वरांचेर जुवारी पुला वयल्यान ‘डस्टर कार’ न्हंयेंत पडून चार जाणांक अपघाती मरण येवपाची भिरांकूळ घडणूक घडली. बिरेस्तारा दनपारां 1 वराचेर मोटारी सयत चवगांच्योय कुडी न्हंयेंतल्यान भायर काडपाक येस आयलें. ह्या अपघाताक लागून पुराय गोंयचेर दुख्खाची सया पातळ्ळ्या.
इश्टाच्या वाडदिसाचे कार्यावळीक हाजेरी लावन डस्टर मोटारींतल्यान आगशें वतना मोटारी वयलो ताबो सुटिल्ल्यान मोटार पुलाच्या कठड्याक आदळून न्हंयेंत पडली. ओव्हरटेक करतना चालकाचें मोटारी वयलें नियंत्रण सुटिल्ल्यान हो अपघात घडलो, असो दुबाव
आसा.
प्रिसिला क्रुज (53), प्रिसिलाचो घोव हेन्री अारावजो (45), देर आल्वीन अरावजो (35) आनी इश्ट ऑस्टीन फर्नांडीस (35) हांकां मरण आयलें. चवगूय लोटलेचे. प्रिसिला क्रुज, हेन्री अारावजो आनी आल्वीन अारावजो हे एकाच कुटुंबांतले.
दनपारां 12 वरांचेर मोटार आनी कुडींचो सोद घेवपाक सुरवात जाली. एक वरा उपरांत नौदळाच्या जवानांनी दिलीप बिल्डकॉनच्या क्रेनीन मोटार भायर काडली. चवगांच्यो कुडी मोटारींतूच आशिल्यो. हेन्री आरावजो हाची कूड ड्रायव्हराच्या सिटाचेर आशिल्ली. हाका लागून हेन्री गाडी चलयतालो अशी म्हायती उजो पालोवपी दळाच्या जवानांनी दिली. फुडलो तपास पुलीस करतात.
ओव्हरटेक करतना मोटारी वयले सुटलो ताबाे
इश्टाच्या वाडदिसा निमतान जीए – 08 – के 8334 हे मोटारीन पणजे वतना जुवारी पुलाचेर एका वाहनाक ओव्हरटेक करपाच्या यत्नांत हो अपघात घडलो. मोटारी वयलो ताबो सुटिल्ल्यान ती पुलाचो कठडो मोडून न्हंयेंत पडली. मोटारीच्या नेटाच्या धपक्यान पुलाचो कठडो मोडून पडलो. फाटल्यान येवपी वाहनचालकांनी रातीं अपघाताची खबर पुलीस तशेंच उजो पालोवपी दळाक दिली. रातीं 1.15 वराचेर उजो पालोवपी दळान न्हंयेंत मोटारीचो सोद घेवपाचो यत्न केलो. पूण रातच्या काळखांत तांकां येस आयलें ना.
जुवारी पुला पोंदा मेळ्ळी मोटार
दनपारां पावणे बारा वरांचेर लोहचिंबक दसलो आनी तो घट जालो. ह्या वेळार पाणबुड्यांनी उदकांत वचून पळोवणी केली. पुला पोंदा मोटार आशिल्ली. मोटारीचो सोद लागले उपरांत ती क्रेनीन उबारून फेरीबोटींत घातली. चारूय जाणांच्यो कुडी मोटारींत आशिल्यो. फेरीबोटींत मोटारीचे पत्रे कातरून कुडी भायर काडल्यो.
लोहचिंबकाच्या आदारान घेतलो सोद
फातोडेर पावणे चार मेरेन उजो पालोवपी दळान मोटारीचो सोद घेतलो. पूण मोटार मेळ्ळी ना. उपरांत नौदळाच्या मजतीन सोद सुरू केलो. क्रेनीक नायलॉनाचे दोरयेक लोहचिंबक बांदून मोटारीचो सोद घेवपाक नौदळाच्या जवानांनी सुरवात केली.
सोदकार्य चल्लें बारा वरां
रातीं एक वराचेर सोद कार्य सुरू जाल्लें. पुलीस, उजो पालोवपी दळ आनी नौदळाचे जवान मोटारीचो सोद घेताले. बारा वरां उपरांत मोटारीचो सोद लागलो. अपघाताची खबर मेळटकूच लोकांनी पुलाचेर गर्दी केली. हाका लागून येरादारीची कोंयडी जाली. अालेक्स, सिल्वेरा आंतोन वाझ पावले घडणूक थळार नुवेंचे आमदार आलेक्स सिक्वेरा, कुठ्ठाळीचे आमदार आंतोन वाझ, फ्रान्सीस सिल्वेरा, विरियतो फर्नांडीस हांणी घडणूक सुवातेर भेट दिवन सोद कार्याची पळोवणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
