जुगारा मुखार शरणागती?

भांगरभूंय | प्रतिनिधी

अमेरिकेंत जसो आॅनलायन जुगार प्रतिबंध कायदो आसा, तसो भारतांतूय जाय. कारण…..

अाॅनलायन बॅटिंगाचेर सर्वोच्च न्यायालयान एका प्रकारची असहायता उक्तायल्या. ‘आयपीएल क्रिकेट सर्तीच्या नांवा खाला लोक सट्टो, जुगार खेळत आसात. आमकां खबर आसा हें बंद जावंक जाय. पूण तुमचो घडये असो गैरसमज आसतलो की कायद्यान हें बंद करपाक मेळटलें.’ अशें न्यायालयान म्हणलां. आॅनलायन अॅप्स नियंत्रणा खाला हाडपाची मागणी करपी जनहीत याचिकेचेर काल सुनावणी जाली. ‘जे प्रमाण आमी लोकांक खून करपा पसून आडवंक शकनात. तेच प्रमाण खंयचोच कायदो लोकांक सट्टो, जुगार खेळपा पसून आडावंक शकना,’ अशेंय न्यायालयान सांगलें. ह्या विशयाचेर केंद्र सरकार कितें करतलें, ताची जाप तांणी मागल्या. अॅटर्नी जनरल आनी साॅलिसिटर जनरला कडल्यानूय मजत मागल्या. गरज पडल्यार राज्यां कडल्यानूय जाप मागतले, अशें न्यायालयान स्पश्ट केलां.
न्या. सुर्यकांत आनी एन कोटिश्वर सिंग हांचे मुखार के ए पाॅल हांची ही याचिका सुनावणेक आयिल्ली. आॅनलायन बॅटिंगेक आनी जुगार अॅप्सांक लागून एका तेलंगणांतूच 1023 भुरग्यांनी जीव दिला, असो दावो याचिकेंत केला. ‘हाका तेलगू आनी हिंदी सिनेसृश्टींतले 25 अभिनेते, क्रिकेटर आनी सोशल मिडिया इन्फ्ल्यूएन्सर जापसालदार आसात. ते सांगतात ताका भुलून लाखांनी भुरगे आॅनलायन जुगार, बॅटिंग खेळटात, आॅनलायन पंगड वेंचून काडटात…. पूण हातूंत पयशे मेळूंक ना, म्हणटकच निरशेवन थोडे आत्महत्या करतात,’ अशें पाॅल हांचे याचिकेंत म्हणलां. सिगारेटाच्या पाकिटाचेर शिटकावणी आसता, तशी जुगार अॅप्सांचेर आसना. देशा खातीर खेळिल्ले खेळगडे, पंगडूच आयपीएला वेळार जुगाराच्या अॅप्सांची जायरात करतात, अशें तांणी म्हणलां. न्यायालयान हाचेर हुस्को उक्तायलो. ‘आयपीएलाच्या नांवार लोक उक्तेपणी जुगार खेळत आसात. ही समाजांतली एक विकृती आनी कायदो लोकांक आपूण जावन सट्टो खेळपा पसून आडावंक शकना. सध्या आमी भुरग्यांक इंटरनेट दिला. ते तो शाळांनी घेवन वतात. पालक एक टिव्ही पळयतात, भुरगीं दुसरो. समाजाची बुन्यादूच हाल्ल्या. कितें करपाक शकतात आमी, जेन्ना लोकूच आपूण जावन बॅटिंगांत वांटो घेतात? हें बंद जावंक जाय, ह्या मताचे आमीय आसात. पूण कायदो हें आडावंक शकता, हो तुमचो गैरसमज’, असो हुस्कोय खंडपिठान उक्तायलो.
फक्त क्रिकेटीच्या मळारूच न्हय तर सगले कडेन जुगाराक बरे दीस आयल्यात. कॅसिनो विशीं म्हायती आशिल्ल्या गोंयकारांक हाचेर चड सांगपाची गरज ना. गोंयकारांक खेळूंक दिवचे नात, अमूक करतले, तमूक करतले अशें सरकारी यंत्रणा म्हणटाली…. आनी ते वटेन नवे- नवे कॅसिनो येत आसात. उदकांत तशे जमनिरूय. तांणी राज्याचे अर्थवेवस्थेक बळिश्ट धिगी लायल्या, म्हणटकच कोण कांय म्हणपाक शकनात. फुडल्या पांच वर्सांनी दर्यादेगां वयल्या गांवांनी व्हड प्रमाणांत जुगार सुरू जातलो काय अशी भिरांत दिसपाक लागल्या. खरेंच, भिवपाची गरज आसा. ते सगले कडेन जमनी विकत घेत सुटल्यात. बरें ह्या कॅसिनो मळाचेर कितल्या गोंयकारांक प्रत्यक्ष, अप्रत्यक्ष रोजगार मेळ्ळा? आंकडो बरोच उणो आसतलो. सांजवेळा पणजे आयल्यार हजारांनी जुगारी मांडवी देगेर दिसतले. हे सगलेच भायले काय? आतां तर ह्या जुगारा वांगडा हावझी, मटको, धिरयो सगलें कितें चालू आसा. समाज सुदारले बगर जुगार बंद जावचो ना. जुगारांत रातयां गिरेस्त जाल्ले लोक आसात, पूण ते जुगार खेळोवपी, खेळपी न्हय. खेळपी चार फावटी जिखतात आनी पांच फावटी हारतात. ह्या हातांत पयशे येतात आनी त्या हातांतल्यान वतात, असलो हो प्रकार.
टीव्ही, सोशल मिडियाचेर जुगाराचे साबार अॅप्स दिसतात. तांची जायरात करतात कोण, तर नट आनी खेळगडे. ते जुगाराक तेंको दितात, असो हाचो अर्थ. पयशां खातीर कितेंय करपाक ते तयार. भारतांत आॅनलायन जुगार कायदेशीर आसा. ताका लागून केंद्र, राज्य सरकारां तो बेकायदेशीर जाहीर करिनात, तो मेरेन हें चलत रावतलें. प्रत्यक्ष पयशे लावन खेळपाच्या आॅनलायन जुगाराचेर आनी पयशे जोडूंक खेळिल्ल्या कुशळटाय खेळांचेर तेलंगण आनी आंध्रांत बंदी आसा. तरीय लोक खेळटात. तामिळनाडू सरकारान हालींच आॅनलायन जुगार बंद केला. देशांत प्रत्यक्षांत खेळटात तो जुगार बेकायदेशीर, 1867 च्या कायद्या प्रमाण. पूण तो पाळपी थोडेच आसतले. अमेरिकेंत जसो आॅनलायन जुगार प्रतिबंध कायदो आसा, तसो भारतांतूय करपाक जाय. कारण वयर सांगलां ते प्रमाण, चडशे जुगारी भिकेक लागल्यात. हजारांनी संवसार उध्वस्त जाल्यात. जुग्याऱ्यांक सोरो, ड्रग्साचें वेसन लागून तांणी जीव वगडायल्यात. क्रिकेट खेळगड्यांक लाखांनी रुपया मेळटात, ताचे भायर जायराती करून ते लाखांनी जोडटात, तरीय तांची पयशांची हाव सुटना. कांय जाण झटपट पयसो करपाक सट्टेबाजी, मॅच फिक्सींग करतात. कांय जाणांक निलंबितूय केल्यात. जुगाराचेर नियंत्रण येवपाकूच जाय. कारण तो मानसीक नदरेन खेळप्याक अस्वस्थ करतात. हारलो जाल्यार खेळपी जीव दिवंक शकता. न्यायालयान आतां जुगाराच्या कायद्यां विशीं कितें तो निर्णय घेवपाचें कार्ड सरकाराचे वटेन उडयलां, सरकारान चड विचार करिनासतना ट्रम्प कार्ड उडोवन हो जुगाराचो खेळ सोंपोवचो.