भांगरभूंय | प्रतिनिधी
-इब्रामपुरांतल्या सांतेरी देवीच्या जात्रोत्सवांतलो प्रकार, थळाव्या कडल्यान नाराजी
पणजी: पेडणें म्हालांतल्या विवीध गांवांतल्या जात्रोत्सवांत जुगार चलता आनी अशा प्रकारान बेकायदो चलपी जुगार बंद जावचो, हे खातीर जायत्या जाणांनी यत्न सुरू केल्यात. पूण इब्रामपुरांतल्या सांतेरी देवीच्या जात्रोत्सवांत चलपी बेकायदो जुगाराक विरोध करप्यांची नांवां मंदीर वेवस्थापन समितीन थेट नोटीस बोर्डाचेर लायल्यात. समितीच्या ह्या कृत्याक जायते जाण आक्षेप घेवपाक लागल्यात.
इब्रामपुरांतल्या सांतेरी देवीच्या जात्रोत्सवांतल्या जुगाराक राजाराम विष्णू गांवस हांचे सयत वट्ट 15 जाणांनी विरोध करून पुलीस म्हासंचालका सयत मोपा पुलीस स्टेशन, उत्तर गोंय पुलीस अधिक्षक, उपअधिक्षक तशेंच गुन्यांव फांट्याक लेखी निवेदन सादर केला. ह्या निवेदनाचेर राजाराम विष्णू गांवस हांचे सयत गंगाराम एस. गांवस, गोपाळ के. मठकार, विकास आर. गांवस, रामचंद्र व्ही. गांवस, संतोष एच. धाऊस्कार, सुधीर यू. धाऊस्कार, अर्जुन एम. धाऊस्कार, कृष्णा व्ही. गांवस, महादेव व्ही. गांवस, कृष्णा एच. धाऊस्कार, नागेश एस. गांवस आनी मच्छिंद्रनाथ गांवस हांच्यो सयो आसात.
मंदीर समितीन थेट जुगाराक विरोध करप्यांचीं नांवां नोटीस बोर्डाचेर लायल्या. ताका लागून बेकायदो जुगाराक विरोध करप्यां मदीं मंदीर समिती आड तिडकीचें वातावरण पातळ्ळां. लोक जात्रोत्सवांत कफ्त देवीचो आशीर्वाद घेवपा खातीर येतात, पूण बेकायदो जुगाराक लागून लोकांक त्रास जाता. ताका लागून सांतेरी देवीच्या जात्रोत्सवांतल्या बेकायदो जुगाराक आमचो विरोध आसा. महाजन आनी इब्रामपूर ग्रामस्थांनी हाचे कडेन लक्ष दिवन जुगाराक थारो दिवचो न्हय. जात्रोत्सव शांततायेन जावचो हे खातीर यत्न करचे, अशें जुगाराक विरोध करप्यांनी निवेदनांत नमूद केलां.
मजगतीं, मंदीर समितीन जुगाराक विरोध करप्यांचीं नांवां अशा प्रकारान नोटीस बोर्डाचेर लावप चुकीचे आसा. हे विशीं मामलेदारांनी खर पावलां उबारप गरजेचें आशिल्लें, पूण अजून तशें जावंक ना, अशें सरपंच अशोक धाऊस्कार हांणी आमच्या प्रतिनिधी कडेन उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
