भांगरभूंय | प्रतिनिधी
वास्को: गोंय क्रिकेट असोसिएशना वतीन 9 आनी 10 सप्टेंबर दिसा 40 वर्सां पिराये सकयल्या बायल आनी दादलो खेळगड्यां खातीर पंच (अंपायर) कोर्स आयोजीत केला. समारोपा वेळार संबंदितांची लेखी परिक्षा जातली अशें असोसिएशनाचे अध्यक्ष विपूल फडते हांणी सांगलें. ह्या अभ्यासक्रमाक लागून पंचांक तांच्या संभाशण कुशळटायेची मजत जातली. तांकां खेळाचें नेम आनी कायद्या विशीं म्हायती दितले अशें जोड सचीव रुपेश नायक हांणी सांगलें.
सगल्या इत्सूक आदले रणजी खेळगडे आनी क्रिकेट मोगींनी गोंय क्रिकेट असोसिएशनाच्या फेसबूक आनी वॅबसायटीर अपलोड केल्लो गुगल फॉर्म भरूंक जाय. जे फॉर्म भरचे नात तांकां वांटेकार करून घेवचे नात अशें फडते हांणी स्पश्ट केलें.
असोसिएशन रोखडोच एक अॅप तयार करपाच्या यत्नांत आसा. जाका लागून असोसिएशनान आयोजीत केल्ल्या सगल्या मॅचींचे स्कोर सहजतायेन मेळूंक शकतलो. हो अॅप डिसेंबर मेरेन तयार जातलो अशी आस्त तांणी उक्तायली.
पंचा खातीरच्या ह्या अभ्यासक्रमा वरवीं आमच्या पंचांक वेवसायीक विकासांत सुदारणा करपाचो आमचो हावेस आसा. जेणे करून ते बीसीसीआयचे परिक्षे खातीर वतात तेन्ना तांकां बरी कामगिरी करूंक मजत जातली अशें फडते हांणी सांगलें.
आमी नवे तंत्रज्ञान वापरतले. आमचे स्कोर बरोवप्यांक त्या तंत्रज्ञाना विशीं म्हायती दितले. नवो अॅप दरेक खेळगड्याची कामगिरी कशी आसा हाची सगल्यांक म्हायती दितलो. एखादो तंत्रज्ञान कार्यवाही जाले उपरांत आमी स्कोर बरोवप्यां खातीर एक अभ्यासक्रम आयोजीत करतले अशें रुपेश नायक हांणी सांगलें.
2023-24 चो क्रिकेट मोसम 15 ऑक्टोबरा सावन सुरू जावपाची शक्यताय आसा. आमकां हंगामाची सुरवात आंतरशालेय मॅचींनी करपाची आसा अशें नायक हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
