भांगरभूंय | प्रतिनिधी
भांगरभूंय । खबरां मेज
पणजीः गोंय विद्यापिठान विद्यापीठ विद्यार्थी युनियनाचे (जीयूएसयू) वेंचणुके संबंदात जें पत्रका जारी केलां तें लिंगडोह समितीच्या मार्गदर्शक तत्वांचें उल्लंघन करपी आशिल्ल्यान फाटीं घेवन नेमांत बदल करपाची मागणी अखील भारतीय विद्यार्थी परिशदेच्या (अभाविप) गोंय फांट्यान केलां. ते संबंदीचें निवेदन अभाविपच्या शिश्टमंडळान विद्यापिठाच्या कुलसचिवांक सादर केलां.
जीयूएसयू वेंचणुकेंत खंडीत जीयूएसयू परिशद तयार करपाचो यत्न करता असो अभाविपचो आरोप आसा. कुल सचिवांक सादर केल्ल्या निवेदनांत तांणी वेंचणूक काद्यतांत घटनात्मक सुदारणा करपाची सूचोवणी तांणी केल्या.
वेंचणूक नेमांत बदल करून हुकूमशायेच्या मार्गान वचपाचो हो यत्न आसा असो आरोप अभाविपची गोंय संयोजक धनश्री मांद्रेकार हिणे केला. पंगु विद्यार्थी नेतृत्व तयार करपाचो हो यत्न आसा अशें कोंकण प्रांत सहमंत्री अवधूत कोटकार हाणे म्हणलां. अभाविपन केल्ल्यो मागण्यो चालीक लावपाचें आस्वासन कुलसचिवान दिलां अशें अभाविपच्या शिश्टमंडळान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
