भांगरभूंय | प्रतिनिधी
सप्टेंबर 2013 वर्सा गोंय वैजकी म्हाविद्यालयांत बॅचलर ऑफ फिजियोथेरपी (बीपीटी) अभ्यासक्रम गोंय सरकारान 10 सुवाती सयत सुरू केलो. तो गोंय विद्यापिठाक संलग्न आशिल्लो. आयज एक दशका उपरांत तातूंत 22 सुवाती आनी तशेंच 7 पदव्युत्तर जागे (4 वेगवेगळ्या उप- विशेशज्ञांनी मास्टर्स आॅफ फिजियोथेरपी) आसात. एमपीटी विद्यार्थ्यांच्या पयल्या गटान फेब्रुवारी 2023 वर्सा येसस्वीपणान पदवी मेळयली.
समस्या आसून लेगीत आमच्या ह्या मळा विशीं आशिल्ल्या निर्धारान आनी आवडीन आयची आशादायक बुन्याद घाली. आमच्या विद्यार्थ्यांनी वेगवेगळ्या कार्यशाळांनी आनी सीपीडींनी वांटो घेतला, अशे तरेन तांचें गिन्यान, कुशळटाय आनी अणभव वाडयल्यात, देखून ते तांच्या दुयेंतींक व्यापक आनी पुराव्याचेर आदारीत काळजी दिवपाक सक्षम जाल्यात.
एक दशका उपरांत गोंय वैजकी म्हाविद्यालयांतल्या फिजियोथेरपीन राष्ट्रीय तशेंच आंतरराष्ट्रीय पांवड्यार वावुरपी तांच्या विद्यार्थ्यांच्या यशाक लागून उल्लेखनीय कामगिरी केल्या आनी नवी उंचाय मेळयल्या.
फिजियोथेरपी भलायकीयुक्त जिणे पद्दत परतून मेळोवपाक मदत करता, वेदना उणी करता आनी कुडीचें कार्य सांबाळटा. जिणेच्या सगळ्या पांवड्यावेल्या लोकांक जखमेंतल्यान बरे जावपाक, वेदना उणी करपाक, हालचाल वाडोवपाक, शारिरीक, मानसीक, भावनीक आनी समाजीक बऱ्यापणाचो आस्पाव करून कार्यक्षमताय आनी जिणेंचो दर्जो चडांत चड बरो करपाक आदार दितात.
आमच्या वेवसायाची व्याप्ती बहुआयामी आसा, जातूंत समाजाक सोयीस्कर जिवीत जगपाक मदत करपा खातीर थेट दुयेंतींची जतनाय आनी भौशीक भलायकी रणनितींचो आस्पाव जाता.
10 वर्सां वयर फिजियोथेरपिस्ट जावन, म्हज्या सगळ्या दुयेंतींक पोस्ट थेरपीक लागून वेगवेगळ्या जखमेंतल्यान बरे जाल्ले पळोवन, वेदना मुक्त जाले उपरांत तांचें हांसू परत येता तेन्ना म्हाका अफाट खोस मेळ्ळ्या.
समाज पांवड्यार दुयेंतींची जतनाय आनी उपचार दिवप हें दरेका थेरपिस्टाचें प्राधान्य जालां. दुयेंतीचें घर वा निवासी जतनाय सुविधा आसूं येता, जंय दुयेंती रावता. अशी उपचार पद्दत दिवन दुयेंतीक घरांतल्याच सारकें दिसता आनी ते प्रक्रियेक आदार दिवपाक मदत करतात.
वेगवेगळ्या भलायकी केंद्रांनी आनी शिबिरांनी दिवपी उपचार, चड संख्येन लोकांचेर उपचार करपाक आनी समाजांतय जागृताय हाडपाक मदत करतात.
आमी तांचे शारिरीक भलायकेचें मुल्यांकन करपाक सक्षम आसात आनी खंयचेय स्नायू- अस्थिबंधन, तंत्रिका तंत्र, बालरोग, हृदय अपंगत्व आदी वळखुपाक सक्षम आसात, अशे तरेन स्थितीचें निदान करतात आनी तांच्या समस्या वळेरे प्रमाण उपचार येवजण नियोजीत करतात. हाका लागून तांच्या वेदनेचो वा अपंगत्वाचे स्रोत वळखुपाक आनी ताचेर रोखडेंच उपचार करपाक वा देखरेखीच्या कार्यावळीचो सल्लो दिवपाक आमकां मदत जाता. तशें केल्ल्यान स्थिती वायट जायना.
आयज गोवा वैजकी म्हाविद्यालय यशस्वी संस्था म्हणून उबी रावता, फिजियोथेरपीच्या वेगवेगळ्या मळार तज्ञताय आशिल्ले कुशळ फिजियोथेरपिस्ट आनी बरे अणभव आशिल्ले विद्यार्थी तयार करता. देखून ते आमच्या गोंय राज्यांत भलायकी सेवांचो दर्जो उंचायेर व्हरतात.
डॉ. अलिशा ग्रासियश
सहाय्यक प्राध्यापक, फिजियोथेरपी
जीएमसी, बांबोळी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
