भांगरभूंय | प्रतिनिधी
पणजी, ज्ञानेश्वर वरक : वारखंड पंचायतींतल्या शेमेचे आडवण गांवांतल्या सैमीक झर्यांत माती घालून तो पुरयल्ले खातीर जीएमआय गोंय इंटरनॅशनल ऍरपोर्ट लिमीटेडाचो सीईओ आर. व्ही. शेशना आड वारखंड पंचायतीची सरपंच मयुरी तुळसकार हांणी उपजिल्होधीकार्या कडेन कागाळ नोंद केल्या.
सर्वे नंबर, १०२ नांत ‘वजर’ नांवाचो झरो आसा. जीएमआरान विमानतळाचें बांदकाम करतना काडिल्ली माती ह्या झर्या मुखार उडयल्ल्यान तो पुरलो. झर्याचें उदक व्हांवतालें, पूण आतां ताचेर परिणाम जाला अशें सरपंच तुळसकार हांणी सांगलें.
जीएमआरान झर्या कडेन माती उडयली तेन्ना कोणाच कडल्यान कसलेच परवाने घेवंक ना. पंचायतीकूय हे विशीं म्हायती दिवंक ना आनी विश्वासांतूय घेवंक ना असो आरोप केला. झर्याच्या मुखार माती उडयल्ल्यान उदक व्हांवपाचें उणें जालां. हाचो परिणाम ह्या झर्याच्या उदकार निंबून आशिल्ल्या गांवांचेर जाला. ह्या झर्याच्या उदकाचेर शेमेचे आडवण, वारखंड, नान्याचे पाणी, निगाळ, खाजने अशे हेर कांय गांव निंबून आसात तांचेर परिणाम दिसून येवपाक लागल्यात, अशें सरपंच मयुरी तुळसकारान सांगलें.
कागाळ पावल्या उपरांत पेडणें उपजिल्होधीकारी दिपक वायंगणकार हांणी जीजीआयएएलाचो सीईओ आर. व्ही. शेशनाक हांकां काम बंद दवरपाची ऑर्द काडल्या. वांगडा शोकॉज नोटीसूय काडल्या. लॅड रॅव्हेन्हीव कॉड १९६८च्या कलम ३३ खाला ही नोटीस काडल्या.
हे सुवातेर वचून पळोवणी करून, झरो पयले वरींच करचो अशें ऑर्दींत म्हणलां. वांगडा वारखंड पंचायतीच्या तलाठ्यान ११ जानेवारी पयलीं तपासणी रिपोर्ट दिवचो म्हणून उपजिल्होधिकार्यांची ऑर्द आसा.
हनुमंत आरोसकर हांणी युनीयन ऑफ इंडिया आड सर्वोच्च न्यायालयान मोपा विमानतळा आड याचिका घाल्ली. ते याचीकेचेर १६ जानेर २०२० वर्सा सर्वोच्च न्यायालयान निकाल दिलो. तेन्ना न्यायालयान विमानतळ बांदपी कंपनीक कांय अटी घाल्ल्यो. तातूंतली एक अट अशी आशिल्ली, विमानतळाचें बांदकाम करपी कंपनीन लागसारच्या सैमीक झर्यांचें लुकसाण करचें न्हय. सगळे झरे राखचे. लागसारच्या वठारांनी हुंवार येवचो न्हय देखून आपल्या स्वताच्या उदकाक दुसरो मार्ग तयार करचो अशें म्हणलें. तशेंच वर्सूकी उदकाच्या प्रदुशणाचो रिपोर्ट संबंधीतांक दिवचो, अशेंय म्हणिल्लें.
सर्वोच्च न्यायालयान घाल्ल्यो अटी जीएमआरान पाळच्यो अशें मत तेन्ना मोपाआड पर्यावणा राखपाक झगडपी ऍक्टीव्हीस्ट अभिजीत प्रभुदेसाय हांणी उक्तायल्लें. एप्रील, मेंत नळांनी उदक सारकें येना. तेन्ना थळावे ह्याच झर्याच्या उदकाचेर निंबून आसतात. सरकारान योग्य पर्याय सोदचो, बेकायदेशीरपणान झरे पुरोवपी कंपनीआड कारवाय करची आनी थळाव्यांक न्याय दिवचो अशी मागणी सरपंत मयुरी तुळस्कार हांणी केली. हेर पंच, सरपंचांनीय जागे जावचें आनी आपल्या वठारांतले उदकाचे झरे वाटोवचे असोय उलो तिणें मारलो.
मजगतीं, चांदेल पंचायत वठारांत येवपी झर्याच्या मुखार मोपाची माती येवन सांठिल्ल्यान तो व्हवपाचो बंद जावपाक आयला. हो झरो रानां खात्याच्या वठारांत येता. ह्या झर्याच्या उदकाचेर रानांतली जनावरां निबूंन आशिल्लीं. तीं आतां गांवांत उदकांत देंवपाक लागल्यांत म्हणून थळावे कागाळी करपाक लागल्यात. ह्या झर्याचेर मात सगळ्यांनी आडनदर केल्ल्याचें दिसून येता. ह्या झर्याच्या उदकाचेर कांय गांवूय निंबून आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
