भांगरभूंय | प्रतिनिधी
डॉ. प्रमोद सावंतः पालिका वाठारांतलीं बेकायदाे बांदकामां येतलीं नदरेंत
पणजी : पालिका वाठारांत शुल्काचे आकारणी खातीर जीआयएस सर्वेक्षणाचो उपेग जातलो. जीआयएस सर्वेक्षणाच्या वापरान बेकायदाे बांदकामां नदरेंत येवपा सयत शुल्काची गळटी सोदपाक मजत जातली. मुख्यमंत्री डॉ. प्रमोद सावंत हांणी ही म्हायती दिली. स्मार्ट सिटी मुखेल कार्यकारी अधिकाऱ्यांचे परिशदेंत ते उलयताले.
पणजी स्मार्ट सिटीच्या कामा खातीर केंद्रान 930 कोटी रुपया मंजूर केल्यात. सांत इनेज खारजाचे पुनरुज्जीवन, मळा पंपींग स्टेशन, हुंवार प्रतिबंधक यंत्रणा हांचे 60 टक्के काम पुराय जालां अशें मुख्यमंत्री डॉ. प्रमोद सावंत हांणी सांगलें.
देशांतल्या स्मार्ट सिटी मुखेल कार्यकारी अधिकाऱ्यांची परिशद सोमार आनी मंगळार अशे दोन दीस चलतली. हे परिशदेक देशांतल्या 100 स्मार्ट सिटींचे मुखेल कार्यकारी अधिकारी हाजीर आसात. पणजीचे महापौर रोहीत मोंसेरात, अभियान संचालक कुणाल कुमार आनी अधिकारी हाजीर आसले.
स्मार्ट शारां ही फक्त सिद्धांतीक संकल्पना ना. लोकांचे राहणीमान उंचावपाची संद स्मार्ट सिटी संकल्पनेंत आसा. स्मार्ट शारांचे पद्दतीन सर्वोत्तम पद्दतीचो अापणाव करपा सयत विचारांची आदान प्रदान करपाची संद मेळटा. स्मार्ट शारा खाला शारांनी मुळाव्या सुविधांची निर्मिती जाता. मुळाव्या सुविधांच्या माध्यमान सरकाराक येणावळ कशी येतली हाचो मॉडेल तयार जावपाक जाय. स्मार्ट सिटी खाला सांत इनेज खारजाच्या पुनरुज्जीवना खातीर निधी मेळ्ळा. सांत इनेज खारीज पुनरुज्जीवनाचे 60 टक्के काम पुराय जालां. ते भायर पणजेंत हुंवार प्रतिबंधात्मक यंत्रणेची उबारणी जातली. यंत्रणेचो वावर सुरू जाला.
शारां स्मार्ट करपा खातीर आयज नव्या विचारांचो तशेंच कल्पनांचो अापणाव करपाक जाय. परंपरीक तशेच थारावीक तरेन काम करप परवडपाचें ना अशे अभियान संचालक कुणाल कुमार हांणी सांगलें. स्मार्ट सिटी खाला कमांड अॅण्ड कंट्रोल सेंटर, इलेक्ट्रीक बशी, मांडोवी प्रोमेनेड हे सारख्या प्रकल्पांतल्यान सरकाराक येणावळ मेळप शक्य आसा अशें तांणी सांगलें.
हे परिशदेत स्मार्टप्रोक्योर मार्गदर्शक तत्वांचेर चर्चा जाली. सिमला, भोपाळ आनी अहमदाबाद हांगासरल्या अधिकाऱ्यांनी अणभव सांगलें.
प्रधानमंत्री नरेंद्र मोदी हांणी 25 जून 2015 वर्सा स्मार्ट सिटी अभियान सुरू केलें. शारांची उदरगत आधुनीक पद्दतीन करपी हें अभियान आसा. 19 जानेवारी 2023 मेरेन 181268 कोटींचे 7799 प्रकल्पांची कामां सुरू जाल्यांत.
13 नगरपालिकांचो मास्टर प्लॅन
देशांतली 30 टक्के लोकसंख्या शारी वाठारांनी रावता. गोंयांत शारी लोकसंख्येचें प्रमाण 62 टक्के आसा. हाका लागून शारांत साधन सुविधा तयार जावपाची गरज आसा. राज्यांतल्या 13 नगरपालिकांचो मास्टर प्लॅन तयार करपाची प्रक्रिया सुरू जाल्या अशें मुख्यमंत्री डॉ. प्रमोद सावंत हांणी सांगलें.
कामाची गती उणी आशिल्ल्याचें मान्य
स्मार्ट सिटी खाला पणजेंतल्या कामाची गती सामकी सवकासायेन चलिल्ल्याचें मुख्यमंत्र्यांनी मान्य केलें. तरेकवार एजन्सींक कामां दिल्यांत. काय एजन्सी नेटान काम करिनात, सवकासायेन काम करतात. हाका लागून कांय कामाची गती उणी आसा अशें तांणी सांगलें.
पणजेंत 33 टक्के कामां पुराय
स्मार्ट सिटी खाला पणजेंत 950 कोटींच्या 47 प्रकल्पांक मान्यताय मेळ्ळ्या. हातूंतलीं 58 कोटींच्या 15 प्रकल्पांचीं कामां पुराय जाल्यांत. 892 कोटींच्या 32 प्रकल्पांचीं कामां सुरू आसात. पणजेंत 33 टक्के कामां पुराय जाल्यांत अशें मुख्यमंत्री डॉ. प्रमाेद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
