भांगरभूंय | प्रतिनिधी
खूब जाण दुडू एकठावपाचीं मेशिनां जाल्यांत. जिवाक सुसेग घेनात, कामाच्या ताणांत दीस सारतात. कितल्या जणांक जिविताचो अर्थूच खबर ना.
आमच्या भुरगेपणार स्कुलाची पिकनीक वताली. पिकनीक म्हणल्यार कांय जागे पळेवप आनी थोडी मजा करप इतलोच हेतू आशिल्लो. पिकनीकेक वतना स्कुलाचें नांव बरोवन खासा कातरिल्ले कागदा कुडके व्हरताले आनी ते वतना बसींतल्यान भायर उडयताले. ताचो उद्देश आशिल्लो आमच्या स्कुलाची पिकनीक गेल्या म्हण सांगप. खावपा- जेवपाचेर भर नासतालो, खेळपाक मेळ्ळें की जालें. आयज जर विचारशी त्या काळार कितें पळेल्लें, कांयच याद ना. याद ना उरुंक कारणूय आसा, ते जागे आदले भशेन खंय आसात? इतिहासीक जागे सोडले जाल्यार सगळें बदल्लां. हें जरी याद नासलें जाल्यार पिकनीकेक मजा करून जिविताचे इल्ले खुशाल खीण सारताले इतलें तरी याद आसा.
पिकनीक म्हणल्यार कितें?
पिकनीक म्हणल्यार एक भोंवडी वा सांगाती जेवण जेवूंक एक संद. ते निमतान एका बऱ्याश्या जाग्याची निवड जाता आनी एक कुटूंब वा इश्ट-मित्रांचो एक जोमो सांगाता जेवण घेवन भायर सरता आनी थोडो वेळ सहभागेलीपणान सारतात. जागो थारायतना थंय वेवस्थीत बसूंक मेळटलें, जेवणा वेळार सावळी आसतली, भुरग्यांक खेळूंक मेळटलें, हाची कोण तरी पळेवणी करून येता वा आदीं कोणें तरी त्या जाग्याक भेट दिल्ली आसता. पिकनीकेक गेल्लीं आसतना दुसऱ्याक आपली अडचण जावंची ना वा दुसऱ्याची आपणाक अडचण जावंची ना हाचीय काळजी घेतात. पिकनीक म्हणल्यार सांगातीं वेळ पासार करपाचें एक साधन जंय जिवितांतल्या तणांवांतल्यान मुक्ती, आपलेपणांत भर, नात्यांत सुधारणा, भलायकेंत बदल, नवी नदर, मोगाची परिभाशा आनी खुशालकायेचें नवें किरण रीग घेता.
पिकनीकेंत कितें घडटा?
पिकनीकेंत एक-दोग जण आसनात तर एक जोमो आसता. कांय पावटीं हो जोमो कुटुंबीक आसता, पूण तांतूंत कांय कुटुंबा भायले मनीसूय आसतात. कांय पावटीं हो जोमो इश्ट -मित्रांचो आसता जांतूंत वेग-वेगळ्या धर्माचे, जातिचे, वर्णाचे, पंथाचे मनीस आसतात. पिकनीक कशी जातली हाची आदींच मांडावळ जाल्ली आसता. ते प्रमाणें थारायल्ल्या थळार पावतकच सगळें मांडलां ते प्रमाणेंच जाता. तरी कांय जण स्वातंत्र्य घेतात आनी आपलो वेळ आपले भशेन सारतात. हें सारकें न्हय पूण तशी सूट आसता. पिकनीकेक थोडी वळख आशिल्ले आसतात, जाल्यार कांय घट्ट इश्टूय आसतात. खेळ आसता, ह्या खेळांत वळखी वाडटात, नातीं घडटात. पिकनिकेक गेल्ले कडें कांय जण जिवाभावाचे इश्ट जातात. मदीं चेडवां आसतात, तांची नवी इश्टागत जाता. कांय जणांचो मोग सुद्दां जाता. कांय जण हरशीं उलयनात, पूण पिकनीकेक उलोवंचेंच पडटा आनी जीं बारीक आडमेळीं आशिल्लीं तीं नानपयत जातात. थंय ड्रिंक्स आसता. त्या ड्रिंक्सा वरवीं नव्यो गजाली सुरू जातात. कांय जणां कडल्यान तत्वज्ञानां आयकूंक मेळटात जाल्यार थोड्यांचे नवे गूण भायर सरतात. कोण तरी एक बरो गावपी आसता ताची थंय वळख घडटा, कोण तरी एक शायर आसता, ताचे गूण उग्ते जातात. दुसऱ्याक आधार करपाचो गूण लेगीत थंय फळटा. जेवण केटरर हाडटा पूण सालाद करप, सेंडवीच करप, भेळ करप, जेवणा कडेन वावरप ह्या सारक्या गुणांचीय थंय पारखणी जाता. कोण कितलो बरो उलयता ताचीय कांय प्रमाणांत वळख मेळटा. आनी मुखेल म्हणजे, एकामेकां मदें मोग वाडटा, आपुलकी वाडटा आनी आपलेपण वाडटा. हे शिवाय आनिकूय जायतें अणभवूंक मेळटा.
वर्साक एक तरी पिकनीक
पिकनीकेक वचपाचे फायदे तुमचे मुखार दवरले उपरांत, तुमकां दिसना तुमीय वर्साक एक तरी पिकनीक करूंक जाय म्हण? हय, तुमी जेरूल विचार करचो. कित्याक पिकनीकेक एक अशें वातावरण निर्माण जाता, जंय तुमी घरा कडलें, ऑफिसांतलें आनी खंयचें खंयचें टेन्शन वा ताण सगळें विसरतात. तुमचें मन खेळांत रमता, सांगाता कोण आसा, कोण कितें उलयता तांतूंत भरता, कोण कोणाल्यो यादी व्यक्त करता. कांय पावटीं रडुंक नाशिल्लो मनीस रडटा आनी हांसूंक नाशिल्लो मनीस हांसता. जेवतना तर खुबूच मज्जा जाता. पिकनिकेक सगळ्यांनी सकल जमनीर बसचें आसता. आयज आमच्या कामाच्या व्यापान आमचे कडेन कदेला शिवाय बसूंक जायना. पिकनीकेक नाइलाजान सकल बसचेंच पडटा. थोड्यां कडेन जायना, तरी बसचेंच पडटा. मागीर कोणाक कॅच येता, कोणाच्या भेंडांत येता आनी कोणाच्या पोटांत दुखता. हो खीण पळेवपाक आनी अणभवपाक खूब मज्जा येता. हें घरा कडेन घडना. पिकनीकेक घरांतले भशेन ऑर्डरी सोडूंक मेळनात, सगळ्यां हुजीर सभ्यपणान वागचें आसता. तेन्ना कांय अस्तुऱ्यांच्या मनांत जैताचे लाडू फुट्टात, ही बी तितल्याच मोलाची गजाल. एका खिणाचो जायना, तो एक सुखदिणो आनंद आसता. हे खातीर वर्साक एक पावटीं तरी पिकनीक घडोवन हाडचीच.
पीक नीक सोसायटी
फ्रेंच रेव्हॉल्युशनान पिकनिक संवसारभर लोकप्रीय केली, हें तुमकां खबर आसा? आत्रे- पयऱ्यान जावपी झुजांक विटून 1802 वर्सा, 200 परस चड अभिजात लंडनकारांचो फॅशनेबल पंगड आपली पिकनिक परंपरा आपणा वांगडा घेवन हेर अस्तंती देसांनी पळून गेले आनी पिक नीक सोसायटीची थापणूक केली. ताचे वांगडी फ्रँकोफायल वा फ्रेंच आसूं येतात. ते जंय जंय आशिल्ले, थंय थंय ताणीं पिकनीक परंपरा गाजयली. नाट्य मनरीजवण आनी भव्य जेवण आनी ताचे उपरांत जुगार खेळप हो ह्या पंगडाचो हेत आशिल्लो. 1801 ते 1830 ह्या काळांत फ्रांसा कडेन झुजां थांबलीं तेन्ना फ्रेंच नागरिकांनी आपल्या देसा कडेन मोग दाखयलो आनी पिकनीक एका जाग्यार येवन करूंक चालूच दवरलें. टॉटनहॅम स्ट्रीटांतल्या भाड्यान घेतिल्ल्या कुडांनी हे वांगडी मेळटाले. रांदचीकूड नाशिल्ल्यान सगळें जेवण हेर कडेन करून हाडटाले. दरेका वांगड्यान मनरीजवण आनी जेवणाच्या खर्चाचो वाटो दिवचो पडटालो, तरी कोणाक दुख्ख नासतालें. पिकनिकेचो कोणूच विशिश्ट यजमान आसनाशिल्लो. खावप जेवप आनी मजा करपा बराबर आपल्या देसाचो मोग बाळगप दीच तांची मोख आशिल्ली. अन्न इतिहासकार पॉली रस्सेल सांगता ते प्रमाणें पिक निक सोसायटी 1850 मेरेन तिगली. हातूंतल्यान आमकां कितें देख मेळटा?
सोंपयतना…
चार दिसांचो हो संवसार. आयज न्हिदिल्लो मनीस फाल्यां उठतलोच हाची खात्री ना. खूब जाण दुडू एकठावपाचीं मेशिनां जाल्यांत. जिवाक सुसेग घेनात, कामाच्या ताणांत दीस सारतात. कितल्या जणांक जिविताचो अर्थूच खबर ना. दुस्मानकायो पोसून आसात. ह्या सगळ्यांतल्यान मुक्ती मेळोवंक, केन्ना तरी पिकनीक घडोवन हाडून जिवितांत इल्लीशी खुशालकाय हाडुंया. आमी खुशाल जावंया आनी दुसऱ्यांकूय खुशाल करुंया.
– विन्सी क्वाद्रूस, राय, साश्ट
मो. – 9822587498
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
