भांगरभूंय | प्रतिनिधी
प्रसिद्ध उद्देगपती मुकेश अंबानी हांचे रिलायन्स जियो कंपनीन चवथी निमतान देशांतल्या 8 मेट्रो शारांनी जियो एअर फायबर सुरू केला.
जियो एअर फायबर हें एक एकत्रीत एन्ड- टू- एंड सोल्युशन आसा, जें घरगुती मनरिजवण, स्मार्ट होम सेवा आनी उच्च गतीचें ब्रॉडबँड सारकिल्ल्यो सेवा दितलें. कंपनीन दिल्ली, मुंबय, हैदराबाद, कोलकाता, अहमदाबाद, बेंगळुरू, चेन्नई आनी पुण्यांत जियो एअर फायबर सेवा लायव्ह केल्या.
कंपनीन एअर फायबर आनी एअर फायबर मॅक्स अशीं दोन येवजण्यो सुरू केल्यात. एअर फायबर प्लॅनांत गिरायकाक 30 एमबीपीएस आनी 100 एमबीपीएस अशे दोन प्रकारचे स्पीड प्लॅन मेळटले. कंपनीन सुरवातीच्या 30 एमबीपीएस प्लॅनाची किंमत 599 रुपया थारायल्या. जाल्यार 100 एमबीपीएस प्लॅनाची किंमत 899 रुपया दवरल्या. दोनूय येवजण्यांनी गिरायकांक 550 परस चड डिजिटल चॅनल आनी 14 मनरिजवणेचे अॅप मेळटले.
एअर फायबर येवजणे खाला कंपनीन 100 एमबीपीएस गती आशिल्ली 1199 रुपयांची येवजणय सुरू केल्या. वयर मेळिल्ल्या चॅनल आनी अॅपां वांगडाच नेटफ्लिक्स, अमेझॉन आनी जियो सिनेमा सारकिले प्रीमियम अॅप्सय उपलब्ध आसतले.
इंटरनॅटाची चड गती जाय आशिल्ल्या गिरायकांक ‘एअर फायबर मॅक्स’ प्लॅनांतलो एक प्लॅन वेंचूक मेळटा. कंपनीन बाजारांत 300 एमबीपीएस ते 1000 एमबीपीएस म्हळ्यार 1 जीबीपीएस मेरेन तीन येवजण्यो सुरू केल्यात. 1499 रुपयांक 300 एमबीपीएस गती मेळटली. गिरायकाक 2499 रुपयांक 500 एमबीपीएस मेरेन गती मेळटली आनी गिरायकाक 1 जीबीपीएस गती प्लॅन घेवपाचो आसल्यार ताका 3999 रुपया खर्च करचे पडटले. तशेंच 550 वयर डिजिटल चॅनल, 14 मनरिजवणेचे अॅप्स आनी नेटफ्लिक्स, अमेझॉन आनी जियो सिनेमा सारकिले प्रीमियम अॅप सगळ्या येवजण्यां सयत उपलब्ध आसतले.
जियोची ऑप्टिकल फायबर मुळावी बांदावळ भारतभर 15 लाख किमी आसा. कंपनीन आतां मेरेन जीओ फायबर सेवे कडेन 1 कोटी परस चड जागो जोडला. पूण अजूनय कोट्यांनी घरां आसात जंय तार वा फायबर जोडणी दिवप खूब कठीण. जियो एअर फायबराक लागून निमाण्या मैलांतल्या जोडणीची अडचण उणी जातली. जियो एअर फायबराच्या माध्यमांतल्यान 20 कोटी घरां आनी वाठारांनी पावपाची आस्त कंपनीक आसा.
जियो एअर फायबराच्या लाँचिंग वेळार रिलायन्स जियो इन्फोकॉमचे अध्यक्ष आकाश अंबानी हांणी सांगलें, आमची फायबर- टू- द- होम सेवा जियो फायबर दर म्हयन्याक 1 कोटी गिरायकांक सेवा दिता. पूण अजून लाखांनी घरां आनी ल्हान वेवसाय जोडपाचे आसात.
जीओ एअर फायबर शिक्षण, भलायकी, देखरेख आनी स्मार्ट होमांतल्यान लाखांनी घरांक संवसारीक दर्जाची डिजिटल मनरिजवण, स्मार्ट होम सेवा आनी ब्रॉडबँड सेवा दितले.
जियो एअर फायबर ऑनलायन आनी ऑफलायन बुकींग करूं येता. 60008- 60008 ह्या नंबराचेर मिस्ड कॉल करून वा www.jio.com चेर भेट दिवन बुकींग प्रक्रिया सुरू करूं येता. जियो एअर फायबर जियो स्टोरांतल्यानय विकतेंय घेवंक मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
