भांगरभूंय | प्रतिनिधी
सुहास जोशी जपतात चिकण मातये पसून गणेश मुर्ती घडोवपाची कला
म्हापशें: पुलीस खात्यांत सेवा दिवपी कॉन्स्टेबल सुहास जोशी हांणी आपल्या कुटुंबां सयत जाण्ट्यां सावन चलत आयिल्ली पर्यावरणपुरक अशा चिकण मातये पसून गणेश मुर्ती घडोवपाची परंपरा कायम दवरल्या.
फाटल्या 40 वर्सां परस चड जोशी कुटूंब सेवाभावी वेवसाय करतात. मुर्तीकार सुहास जोशी हांणी गणेश मुर्ती घडोवपाच्या कामांत तांचे भाव देवेंद्र आनी अर्विंद्र हांचे सयत कारागीर इश्ट परिवराचें सहकार्य मेळटा अशें सांगलें.
सुहास जोशी म्हणटात, आमी चिकण मातये पसून गणेश मुर्ती तयार करतात. चिकण मातयेची मुर्ती जड आसतात. पूण त्यो पर्यावरणापुरक आसतात. लोकांनी प्लास्टर ऑफ पेरीसच्या (पीओपी) मुर्तीं बदला पर्यावरणपुरक आशिल्ल्या चिकण वा शाडू मातयेच्या मुर्तींक प्राधान्य दिवचें. पर्यावरणाचे नदरेन त्यो बर्यो आसतात. पीओपी मुर्ती विसर्जन केले उपरांत त्यो उदकांत विरगळनात. वर्सभर तश्योच त्यो उदकांत आसतात. पूण चिकण माती वा शाडूच्या मुर्तींचे विघटन जाता आनी मुर्तीच्या सात्विकतेक आनी भावनेक धक्को पावना.
बाप्पाची मुर्ती साकारपाक खूब कश्ट आनी आस्था लागता. चिकण मातये पसून मुर्ती साकारतना मुर्तीकाराची कसब लागता. पीओपीच्या तोडीक तोड आमी तितलीच सुबक आनी बरी चिकण मातये पसून गणेश मुर्ती तयार करतात. तशेंच आमी नागपंचमी खातीर नाग, श्रीकृष्ण जल्माश्टमीक कृष्ण, नवरात्रोत्सवांत दुर्गा देवीची मुर्ती तयार करतात अशें जोशी हांणी सांगलें.
जोशी हांचे चित्रशाळेंत इको फ्रेन्डली अशा पर्यावरणपुरक आनी रंगा विरयत चिकण मातये पसून गणेश मुर्ती तयार करतात. रंगा बदला हळद, मुलतानी माती, गोरुचा, भाजयां पसून तयार केल्लो सैमीक रंग. सजावटी खातीर साबुदाणो, गंव, कड्डण हांचो वापर करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
