भांगरभूंय | प्रतिनिधी
काश्मीर हो भारताचो एक अभिन्न भाग अशी भारताची बऱ्याच काळा सावन भुमिका आसा. तरीय काश्मीराचो एक तृतीयांश भाग पाकिस्तानान बेकायदेशीरपणान घेतला आनी तातूंतलो चडसो वांटो चीनाक दिला, हें वास्तव. तरी लेगीत पाकिस्तानाची उरिल्ल्या काश्मीराचेर नदर आसा. पाकिस्तान साम, दाम, दंड, भेद अशा सगळ्या पद्दतींचो वापर करून उरिल्ल्या काश्मीराक गिळपाक सोदता, पूण तातूंत ताका यश मेळना. देखून संद मेळटा तेन्ना ते हो मुद्दो आंतरराष्ट्रीय पांवड्यार व्हरपाचो यत्न करतात आनी संवसारांतल्या हेर देशांक हातूंत मध्यस्थी करपाक सांगतात.
हाचे आदीं ते अमेरिकेक मध्यस्थी करपाची विनवणी करताले, पूण भारतान अमेरिकेक ‘काश्मीर भारताचो एक अभिन्न भाग’ अशें सांगले उपरांत अमेरिकेन हो विशय सोडलो. आतां पाकिस्तानान जर्मनीक ह्या प्रस्नाचेर मध्यस्थी करपाची विनवणी केल्या. पाकिस्तानाचे परराश्ट्र मंत्री बिलावल भुट्टो हालींच जर्मनीक गेल्ले. दोनूय देशांच्या परराश्ट्र मंत्र्यांचे बसके उपरांत जाल्ले पत्रकार परिशदेंत जर्मनीची परराश्ट्र मंत्री अनालेना बायरबोक हिणें काश्मीर प्रस्नाचेर संयुक्त राश्ट्रांनी उपाय सोदून काडचो, अशें सांगलें आनी हे खातीर जर्मनी फुडाकार घेतली अशेंय सांगलें.
तांच्या विधानाक भारतान रोखडीच हरकत घेतली आनी काश्मीर प्रस्नांत जर्मनीन नाक घालपाची गरज ना, अशें दाखयलें. काश्मीर हो भारताचो एक अभिन्न भाग आनी आमी कोणाचोय हस्तक्षेप सोंसचे नात, अशें तांणी जर्मनीक सांगलें. फाटल्या कांय म्हयन्यांत अस्तंते कडल्यान कांय देशांनी काश्मीर प्रस्नांत कारण नासतना नाक घालपाक सुरवात केल्या. ताका लागून भारतान जर्मनी सयत अस्तंती देशांक योग्य शिटकावणी दिवन आपली भुमिका जाहीर केल्या. मलेशिया, कॅनडा, तुर्की, म्यानमार ह्या कांय देशांनी हातूंत रूची दाखोवंक सुरवात केल्या, अर्थांत, हाचे फाटल्यान चीनाचो हात आसा हें लिपिल्लें ना.
काश्मीर फाटलीं सत्तर वर्सां जळटालें. आतंकवादान काश्मीरांतल्या लोकांक उध्वस्त उडयल्लें, पूण फाटल्या तीन वर्सांनी, खास करून कलम 370 रद्द जाले उपरांत काश्मीरांत स्वातंत्र्याची नवी फांतोड उदेल्या.अशांत काश्मीर शांत जालां. जंय फारपेट आयकूंक येतालो थंय शाळेंतल्या भुरग्यांचो किलबिलाट आयकूंक येता. काश्मीरांत पर्यटकांची धांवपळ सुरू जाल्या. लाखांनी पर्यटक थंय वचपाक लागल्यात. काश्मीरांत उदरगतीची गंगा नेटान व्हांवपाक लागल्या, ताका लागून काश्मीर आनी काश्मीरी लोक खऱ्या अर्थान मुखेल प्रवाहांत आयल्यात. देखून पाकिस्तान आनी चीनाचेंय पोट दुखपाक लागलां. म्हणटकच ते काश्मीर मुद्दो आंतरराष्ट्रीय पांवड्यार व्हरपाचो नेटान यत्न करपाक लागल्यात. पूण थंय अमेरिका आसूं वा जर्मनी, खंयच्याय देशाक हातूंत तोंड घालपाची गरज ना.
भारत हेर देशांच्या अंतर्गत वेव्हारांत केन्नाच हस्तक्षेप करिना देखून हेर देशांनी भारताच्या अंतर्गत वेव्हारांत हस्तक्षेप करचो न्हय. जर्मनी आनी नेदर्लंडांत ह्या शेजारी देशां मदीं शिमेचो वाद आसा. पूण भारतान तातूंत केन्नाच नाक घालूंक ना, मागीर जर्मनीक ही नसती उठाठेव करपाची गरजूच कितें? हे करपा परस तांणी पाकिस्तान काश्मीरांत जो आतंकवाद पातळायता ताचे कडेन लक्ष दिवचें. कारण जर्मनी सारक्या बळिश्ट अस्तंती देशांनी आतंकवादा कडेन आडनदर केल्यार पुराय संवसाराक ताचें व्हड मोल फारीक करचें पडटलें.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.