जमीन संपादनाक लागून रस्त्यांच्या कामांनी आडखळी

भांगरभूंय | प्रतिनिधी

निलेश काब्रालः लोकांनी आपणें जावन रस्त्या खातीर जमीन दिवची

पणजी: नव्या भूंय संपादन कायद्याक लागून जमीन संपादन करप आडखळीचें जालां. रस्त्या वयले ब्लॅक स्पॉट वा अपघात प्रवण थळां जाग्याक लागून दुरुस्त करप शक्य जायना. लोकांनी आपणें जावन रस्त्या खातीर जमीन दिवपाक फुडें सरचे अशें आवाहन भौशीक बांदकाम खात्याचे मंत्री निलेश काब्राल हांणी केलां.

रस्तो अपघात सुरक्षेचेर शुक्रारा चर्चासत्र (ओपन फोरम) जालें. चर्चासत्रांत उलयतना भौशीक बांदकाम खात्याचे मंत्री निलेश काब्राल हांणी हें आवाहन केलें.

केंद्र सरकारान म्हामार्गाचेर 27 ब्लॅक स्पॉट (अपघात प्रवण वाठार) सोदून काडल्यात. ब्लॅक स्पॉट सुदरपाची प्रक्रिया सुरू आसा. जमनीचे आडखळींक लागून 12 ब्लॅक स्पॉट दुरुस्त करपाक आडखळी येतात. गोंय सरकारान 17 ब्लॅक स्पॉट सोदून काडल्यात. जाग्याक लागून हातूंतले 10 स्पॉट दुरुस्त करपाक आडखळी येतात. लोकांन सुरक्षेचो विचार करून आपणे जावन जमीन दिवपाची गरज आसा. भूंय संपादनाचो नवो कायदो किचकटीचो आसा. ह्या कायद्याक लागून रस्त्यांच्या कामांनी आडखळी येतात अशें मंत्री निलेश काब्राल हांणी सांगलें.

गोंयांत फक्त 5 टक्के राष्ट्रीय म्हामार्ग आसा. राष्ट्रीय म्हामार्गाचेर चडशे अपघात जातात. अंतर्गत रस्त्यांचेर अपघातांचें प्रमाण उणें आसा. राष्ट्रीय म्हामार्गार येरादारीची गती चड आसता. वाहनांचो आंकडो चड आसता. हाका लागून म्हामार्गाचेर चड अपघात जातात.

पर्वरे तीन बिल्डींग रस्त्याचेर फोंडकुलां आसात. हो रस्तो दुरुस्त करपा खातीर कंत्राटदाराचो सोद घेतला. तशेंच करमल घांटार राष्ट्रीय म्हामार्गाचो विस्तार जातलो. अाकासाची झाडां मारचीं पडटलीं. हांगा 65 टक्के आकासाचीं झाडां आसात. खांडेपार पुला कुशीचो रस्तो अर्दकुटो उरला. ह्या रस्त्याचें काम पुराय जातलें अशें निलेश काब्राल हांणी सांगलें.

येरादारीक आडखळ येवपी 600 स्पॉट सोदून काडल्यात. हातूंतल्या 168 स्पॉटांची दुरुस्ती जाल्या. येता त्या चार ते पांच म्हयन्यांत हेर स्पॉटांची दुरुस्ती जातली. रस्ते रूंद करप वा नवे रस्ते करपा खातीर जागो लागतलो. जमीन संपादन करप आतां पयलीं इतलें सोंपें उरूंक ना. लोकांनी आपणें जावन जमनी दिल्यो जाल्यार हो प्रस्नो सुटावो जावपाक मजत जातली अशे मंत्री निलेश काब्राल हांणी सांगलें.