भांगरभूंय | प्रतिनिधी
मुख्यमंत्र्यांची घोशणा, तीन चार म्हयन्यांत प्रकरणां काडटले निकालांत
भांगरभूंय I प्रतिनिधी
पणजी : जमीन बळकावप प्रकरणांत बेगिनूच निवृत्त न्यायाधिशांच्या फुडारपणा खाला चवकशी आयोेगाची स्थापणूक जातली. आयोगा वरवीं तीन ते चार म्हयन्यांत चवकशी पुराय करून दावो सिद्ध करप्यांक तांच्यो जमनी दितले. ज्या जमनींचे धनी मुखार येनात, अशो जमनी सरकाराच्या ताब्यांत उरतल्यो, अशी व्हड आनी म्हत्वाची घोशणा मुख्यमंत्री डॉ. प्रमोद सावंत हांणी सोमारा केली.
प्रुडंट खबरां चॅनेला वयल्या ‘हेडऑन’ कार्यावळींत मुख्यमंत्री उलयताले. बनावट कागदां तयार करून सरकाराच्या वा थळाव्या तशेंच गोंया भायर आशिल्ल्यांच्यो जमनी बळकावपी तशेंच तांची विक्री करप्यांची फाटल्या कांय म्हयन्यां पसून विशेश तपास पथका वरवीं (एसआयटी) चवकशी जाता. एसआयटी कडेन आतां मेरेन अशा प्रकाराची 110 प्रकरणां चवकशे खातीर नोंद जाल्यात, आतां मेरेन 15 जाणांक अटक केल्या. हाचे मुखार अशा प्रकरणांतल्या जमनी विशीं निर्णय घेवपाक निवृत्त न्यायाधिशांच्या फुडारपणा खाला चवकशी आयोग स्थापन करतले. ह्या आयोगाक संविधानीक अधिकार दितले, अशें मुख्यमंत्री डॉ. सावंत हांणी म्हणलें.
जमनी बळकावप प्रकरणांतल्या दोशींक न्यायालया मेरेन पावोवपाचें काम एसआयटी करतली. जाल्यार अशा प्रकरणांतल्या जमनीं विशीं कायदेशीर निर्णय घेवपाचें काम चवकशी आयोग करतलो. जमीन बळकायिल्ल्याचीं प्रकरणां आयले उपरांत फुडल्या तीन ते चार म्हयन्यांत आयोग ताची चवकशी करून अशी प्रकरणां निकालांत काडटलो. बळकायिल्ल्या जमनींच्या मूळ धनयांक तांचे अधिकार परतून मेळोवपाक न्यायालयांत धांव घेवची पडची ना. तांकां थेट आयोगा कडेन जमनीचो दावो करचो पडटलो.
जमीन आपली आशिल्ल्याचे आयोगा मुखार कायदोपत्री सिद्ध करचे पडटले. जे मूळ धनी जमीन आपली आशिल्ल्याचे सिद्ध करतले तांकां तांच्यो जमनी बेगोबेग ताब्यांत दितले. पूण जमनीं खातीर धनी मुखार आयलोना जाल्यार अशो जमनी राज्य सरकाराच्या ताब्यांत उरतल्यो, अशेंय तांणी नमूद केले.
मजगतीं, बेकायदो जमनी बळकायिल्ल्याचीं जायतीं प्रकरणां फाटल्या कांय वर्सांत विवीध पुलीस स्टेशनांत नोंद जाल्ली. पूण ताचेर योग्य पद्दतीन कार्यवाही जावंक नाशिल्ल्या अशा प्रकरणांतल्या आरोपींचेर कारवाय जावंक ना. तशेंच ह्या प्रकरणांत सरकारी खात्याचे अधिकारी, कर्मचारी घुस्पिल्ल्यान अशा प्रकरणां चालू आशिल्ली. हे प्रकार थांबोवपाक मुख्यमंत्री डॉ. सावंत हांणी आयपीएस अधिकारी निधीन वाल्सन हांच्या फुडारपणा खाला एसआयटी स्थापन केली आनी नागरिकांक एसआयटी कडेन कागाळ करपाक सांगलें.
ते उपरांत कांय म्हयन्यांत उत्तर अानी दक्षीण ह्या दोनूय जिल्ह्यांतल्यान वट्ट 110 प्रकरणां एसआयटी कडेन नोंद जाली. तातूंत सगल्यांत चड प्रकरणां बार्देस म्हालांतली आसात. जमीन बळकावप प्रकरणांत आतां मेरेन 15 जाणांक अटक केल्या. पूण ह्या सगल्यांचीच न्यायालयान जामिनाचेर सुटका केल्या. आतां मेरेन अटक केल्ल्यांच्या जबानींतल्यान जमीन बळकावप प्रकरणांत व्हड रॅकेट आशिल्ल्याचे स्पश्ट जाला. तातूंतल्या दरेकल्याक अटक करपाक एसआयटीन झुजा पांवड्यार यत्न सुरू केल्यात.
दोशीं आसपी वतले बंदखणींतः मुख्यमंत्री
एका सर्वसामान्य व्यक्तीन म्हजे कडेन येवन आपली जमीन बळकायिल्ल्याची कागाळ केली. त्यावेळार आपूण बेकायदो रितीन जमनी बळकावप्यांचेर कारवाय करपाचे निश्चीत केल्ले आनी ते खातीर एसआयटीची स्थापणूक केली. जमीन बळकावप प्रकरणातं जायत्या जाणांची चवकशी सुरू आसा. कांय सरकारी खात्यांचे अधिकारी, कर्मचाऱ्यांचोय हातूंत आस्पाव आसा. हातूंतलो कोणूच वाटावचो ना. दोशी आसपी दरेकल्याक बंदखणींत वचचें पडटलें, अशी शिटकावणी मुख्यमंत्री डॉ. सावंत हांणी दिली.
जामीन मेळिल्ले कायमचे सुटूंक नात
जमीन बळकावप प्रकरणांत एसआयटीन आतां मेरेन 15 जाणांक अटक जावन तांची जामिनाचेर सुटकाय जाल्या. ताका लागून लोकांक ते कायमचे सुटले अशें दिसता. पूण ते कायमचे सुटूंक नात आनी सुटचेय नात. ते परतून मेळटले आनी तांचेर खर कारवाय जातली, अशी हमी मुख्यमंत्री डॉ. सावंत हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
