भांगरभूंय | प्रतिनिधी
पणजीः बनावट दस्तावेज तयार करून गोंगुरे, आसगांव बार्देसची मालमत्ता बेकायदो पद्दतीन विक्री केल्ल्या प्रकरणांत विशेश चवकशी पंगडान (एसआयटी) दाभोलवाडो- शापोरा, बार्देसचो अमृत गोवेकार हाच्या आड गुन्यांव नोंद करून अटक केल्या.
ह्या प्रकरणांत बांद्रा (पश्चीम) मुंबयच्या नील आनी फ्लोरेन्स फ्रांसीस ह्या दोगांनी एसआयटी कडेन कागाळ दाखल केल्या. ते प्रमाण दुबावीत अमृत गोवेकार (दाभोलवाडो- शापोरा बार्देस) आनी हेर दुबावितांनी गोंगुरे आसगांवची सर्वे नं 23/ 7 त 800 चौखम मिटर जमनीची बनावट मालकी हक्क आनी हेर दस्तावेज तयार केल्यात, अशें म्हणलां. तशेंच संबंदीत जमीन 6 जानेवारी 2022 ह्या दिसा म्हापशेंच्या नागरी आनी उपनिबंधक कार्यालयांत नोंदणी करून कागाळदाराच्या नांवार करून ताची फटवणूक केल्या, अशें कागाळेंत म्हणलां.
हाची दखल घेवन एसआयटीचे पुलीस अधिक्षक निधीन वालसन हांच्या मार्गदर्शना खाला पुलीस निरिक्षक योगेश सावंत हांणी दुबावीत अमृत गोवेकार हाचे सयत हेरां आड गुन्यांव दाखल केलो. ते उपरांत मंगळारा राती कडेन एसआयटीन दुबावीत गोवेकाराक अटक केली. मजगतीं, एसआयटीन गोंगुरे आसगांव बार्देसच्या जमीन बळकावपाच्या प्रकरणांत दुबावीत सुनील कुमाराक अटक केल्ली. ताणें म्हापशेंच्या प्रथमवर्ग न्यायालयांत मंगळारा जामिना खातीर अर्ज दाखल केलो. न्यायालयान सुनावणी घेवन दुबाविताचो जामीन न्हयकारून चार दीस पुलीस कोठडी फर्मायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
