भांगरभूंय | प्रतिनिधी
मुख्यमंत्रीः खात्याच्या गुदांवांतलो न्हय; दुकानांच्या वेव्हाराची जातली चवकशी
पणजी : गुन्यांव फांट्यान कुट्टी हांगा जो तांदूळ आनी गंव जप्त केला तो सवाय धान्य दुकानांतलो आसा. खात्याच्या गुदांवांतल्यान भायले भायर म्हालाची चोरी जावंक ना. सवाय धान्य दुकानांतल्या वेव्हारांची चवकशी करून म्हाल खंयच्यान आयलो ताचो सोद घेतले. संबंदीत सवाय धान्य दुकानादारांचेर कारवाय जातली अशें मुख्यमंत्री डॉ. प्रमोद सावंत हांणी सांगलें.
मजगतीं, गुन्यांव फांट्याच्या पंगडान बेतोडें – फोंड्यां गुदावांची परतून तपासणी केली. गुदांवांतल्यान तांदूळ वा गंवाची चोरी जाल्या काय कितें हाची चवकशी गुन्यांव फांटो करता. मजगतीं, तांदूळ आनी गंवाच्या रॅकेटांत अटक जाल्ले प्रकाश करीशेट्टर, तौसीफ मुल्ला आनी रामकुमार गणेश हरिजन हांकां फोंडेंच्या पयलो वर्ग न्यायालयान जाचक अटींचेर जामीन मंजूर केला. दरेकी 20 हजारांच्या बाॅण्डाचेर जामीन मंजूर जाला.
तांदूळ आनी गंवाचे विक्रीची चवकशी सुरू आसा. गुन्यांव फांट्यान जो म्हाला जप्त केला, तो सरकारी गुदांवांतल्यान पावूंक ना. नागरी पुरवण खात्याचो हातूंत दोश ना अशें मुख्यमंत्री डॉ. प्रमोद सावंत हांणी सांगलें.
नागरी पुरवण खात्याच्या सगल्या गुदांवांची तपासणी केली. गुदावांतलो म्हाल सारको आसा. जप्त केल्लो म्हाल हो सवाय धान्य दुकानांतलो आसा. सवाय धान्य दुकानदारांनी भायले भायर हो म्हाल विकला. खूबशे रेशनकार्ड धारक आपलो कोटा व्हरिनात. हाका लागून सवाय धान्य दुकानांनी म्हाल शिल्लक उरता. शिल्लक म्हालाची विक्री जाल्या. खंयच्या सवाय धान्य दुकानांतलो हो म्हाल आसा? ताची चवकशी जातली. जो कोण दोशी दुकानदार आसा, ताका अटक जातली. हेर कायदेशीर कारवाय लेगीत जातली, अशें मुख्यमंत्री डॉ. प्रमोद सावंत हांणी सांगलें.
गुन्यांव फांट्यान कुट्टी फोंड्यां धाड घालून तांदळाचे 127 साक आनी गंवाचे 170 साक जप्त केल्ले. हो म्हाल कर्नाटकांत विकपा खातीर गुदांवांत सांठो करून दवरिल्लो. गुन्यांव फांट्यान गाडयां सयत 5 जाणांक अटक केली. गुन्यांव फांट्या कडल्यान चवकशी सुरू आसा. नागरी पुरवण खात्या कडल्यान लेगीत चवकशी सुरू आसा. अजून चवकशी पुराय जावंक ना. हो म्हाल सरकारी गुदांवांतल्यान पावूंक ना, जाल्यार सवाय धान्य दुकानांतल्यान पावला हें स्पश्ट जालां.
तरी लेगीत नागरी पुरवण खात्यान दोन कर्मचाऱ्यांचेर निलंबनाची कारवाय केल्या. गुदांवांतल्या सांठ्याची तपासणी सुरूच आसा. नागरी पुरवण खात्यान तांदूळ तशेंच गंवाचे कितले साक हाडिल्ले आनी ते खंयच्या गुदांवांत दवरिल्ले हाची पडटाळणी सुरू आसा. गुदांवांतलो कितलो म्हाल सवाय धान्य दुकानदारांंक वितरीत केलो हाची म्हायती मेळोवपाची प्रक्रिया नागरी पुरवण खात्यान सुरू केल्या. खात्याच्या गोपां कडल्यान ही म्हायती मेळ्ळी.
सवाय धान्य दुकानांचेर तांदूळ आनी गंवाची सवाय दरान विक्री जाता. दळडीर रेशे सकयल्या लोकांक चड धान्य मेळटा. दळडीर रेशे वयल्या लोकांक तुळेन उणें धान्य मेळटा. बीपीएल आनी एपीएल अशीं दोन प्रकारांचीं रेशनकार्डां आसात. म्हयन्याक दरेकी कार्डा खातीर जो कोटा आसता, तातूंतले कांय रेशनकार्ड धारक धान्य व्हरिनात. हो कोटा सवाय धान्य दुकानदारां कडेन आसता. ह्या कोट्याची दुकानदार बाजारभावांत विक्री करतात, अशो हाचे पयलीं खूबशो कागाळी येताल्यो. आतां लेगीत रेशनाच्या कोट्याची भायर विक्री जाता अशी चर्चा आसा. ह्या रॅकेटाक लागून सवाय धान्य दुकानांचो वेव्हार रडाराचेर आयला. तपासणी करपा खातीर खात्यान दोन घोळटे पंगड तयार केल्यात. खंयचे सवाय धान्य दुकानदार चड कोटा व्हरतात तांचे विशीं आतां दुबाव निर्माण जाला.
नागरी पुरवण खात्याक क्लीन चीट
नागरी पुरवण खात्याच्या गुदांवांतल्यान म्हालाची चोरी जाता असो समज हें रॅकेट उक्ताडार आयले उपरांत जाल्लो. हाका लागून 11 गुदांवांतल्या म्हालाची तपासणी जाली. गुदांवांतलो म्हाल सारको आसा. हाका लागून मुख्यमंत्र्यांनी नागरी पुरवण खात्याक क्लीन चीट दिल्या.
सवाय धान्य दुकानदारां मदीं अस्वस्थताय
सवाय धान्य दुकानांतलो म्हाल खासगी गुदांवांनी पाविल्ल्यान दुकानदारांची चवकशी जातली. म्हाल तशेंच नोंदवही आनी बिलांच्या आदाराचेर जप्त केल्लो म्हाल खंयच्यान आयला? ताचो सोद घेवपाची प्रक्रिया सुरू आसा. हाका लागून सवाय धान्य दुकानदारां मदीं अस्वस्थताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
