भांगरभूंय | प्रतिनिधी
दिगंबर कामतः ज्येश्ठ पत्रकार प्रमोद प्रभुगांवकार हांकां भेटयलो सर्गेस्त चंद्रकांत केणी पुरस्कार
भांगरभूंय । प्रतिनिधी
मडगांवः जनमत कौला वेळार लोकां मदीं जागृताय करपांत राष्ट्रमत दिसाळें आनी चंद्रकांत केणी हांच्या लेखनाची मुख्य भुमिका आशिल्ली. त्या वेळा वयली पत्रकारिता आनी आतांची पत्रकारिता हातूंत व्हड फरक आसा. चंद्रकांत केणी हांच्या उगडासा खातीर एकाद्या रस्त्याक वा चौकाक नांव दिवन सन्मान करतले, हो तांचो हक्क आसा, अशें आमदार दिगंबर कामत हांणी सांगलें.
मडगांव पालिकेच्या सभाघरांत सर्गेस्त चंद्रकांत केणी हांचे जयंती निमतान पत्रकारिता पुरस्कार सुवाळो जालो. ह्या वेळार आमदार कामत हांचे सयत अरविंद भाटीकार, संपादक राजू नायक, प्रुडंट नेटवर्काचे संपादक संचालक प्रमोद आचार्य, ज्येश्ठ पत्रकार प्रमोद प्रभुगांवकार हाजीर आशिल्ले.
ह्या वेळार सर्गेस्त चंद्रकांत केणी पुरस्कार मानेस्तां हस्तुकीं प्रमोद प्रभुगांवकार हांकां भेटयलो.
केणी आपल्या विचारांचेर ठाम आशिल्ले. तांणी लोकांक केन्नाच चुकीचें सांगूंक ना. राजकी आनी वैयक्तीक जीण हें आमी सदांच वेगळें दवरलां. तांणी घडयिल्ले पत्रकार आयज लेगीत वावर करतात. जनमत कौला वेळार तांच्या विचारांनी लोकांक नवी उर्जा दिली, अशेंय तांणी सांगलें.
अरविंद भाटीकार हांणी सांगलें, पयशांचें फाटबळ नासतना लेगीत चंद्रकांत केणी हांणी कोंकणी दिसालें काडपा खातीर यत्न केले. तांकां हेरांचो सांगात मेळ्ळो आनी त्या वेळार ह्याच लोकांच्या यत्नांक लागून गोंय अजून लेगीत स्वतंत्र राज्य आसा. हिंदूंचीं खूबशीं मतां ह्या राष्ट्रमत दिसाळ्यांतल्या विचारांक लागून गोंयचे वटेन रावली. सध्या प्रसार माध्यमां वयलें चेपण वाडटा. बऱ्या पत्रकारांचेर ह्या ना त्या कारणाक लागून येवपी चेवण पळयत जाल्यार हे कार्यावळींतल्यान ह्या पत्रकारांक इल्लो तेंको मेळटलो, अशी आस्त भाटीकार हांणी उक्तायली.
चंद्रकांत केणी हांणी आमकां घडयतना गोंयची संस्कृती, राजकारण आनी समाजकारणांतल्यो ज्यो गजाली सांगल्यात, त्यो खंयच्याच पुस्तकांत नात. हे सगळे दस्तावेज फुडले पिळगे मेरेन पावोवपाची गरज आसा. तेन्नाच्या राजकी फुडाऱ्यांक लेगीत केणी हांचे कडलो म्हायतीचो भांडार उपेगांत येतालो. राजकी, समाजीक जाणीव आशिल्लोच बरो पत्रकार जावपाक शकता. पत्रकारा कडेन स्वताची मतां जायच, जाल्यारूच तो फुडें काम करपाक शकता. लोकशाय, संविदान तिगोवपा खातीर केणीं सारक्या पत्रकारांची गरज आसा, अशें राजू नायक हांणी सांगलें. केणी हांच्या कुटुंबियांनी सांगलें, मडगांवच्या पांडव चौकाक चंद्रकांत केणी हांचें नांव दिवपाचे आशिल्ले. पूण त्या वेळार चर्चीन विरोध केल्लो, हें दुर्देवी आशिल्लें. तशेंच राष्ट्रमता वयले संपादक म्हूण चंद्रकांत केणी हांचें नांव काडून उडयलें, तो दीस तांचे खातीर त्रासदिणो आशिल्लो, अशें सांगून भावना मांडल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
