भांगरभूंय | प्रतिनिधी
रणजी करंड क्रिकेट सर्तीच्या सी गटांतले मॅचींत छत्तीसगड पंगडान गोंया आड पयल्या दिसा उत्कृश्ट बॅटींग केली. ताणें पयल्या दिसा 4 विकेटी वगडावन 273 धांवड्यो केल्यो.
शहीद वीर नारायण सिंग स्टेडियमाचेर येजमान पंगडान टॉस जिखून पयलीं बॅटींग करपाचो निर्णय घेतलो. ताच्या ओपनरांनी आपल्या मुखेल्याचो निर्णय योग्य थारायलो.
ओपनर अनूज तिवारी आनी शशांक चंद्राकर हांणी पयले विकेटी खातीर वट्ट 163 धांवड्यांची भागिदारी केली. अखेरेक ही जोडी विजेश प्रभुदेसायान फोडली. ताणें शेंकड्या वटेन पावला मारपी अनूजाक वैयक्तीक 86 धांवड्यांचेर बाद केलो. ताणें 11 चवके मारले.
पयली विकेट वगडायल्या उपरांत लेगीत छत्तीसगडान गोंयच्या बॉलरांचेर आपलो शेक दवरलो. आशुतोष सिंगान शशांक वांगडा मेळून छत्तीसगडाक व्हड धांवसंख्ये वटेन व्हरपाक सुरवात केली. मजगतीं, शशांकान आपलो शेंकडो लेगीत पुर्ण केलो.
शेंकडो मारल्या उपरांत शशांक चड वगत खेळपट्टीचेर तग धरपाक शकलो ना. तो 101 धांवड्यो करून बाद जालो. गोंया खातीर ही विकेट लेगीत विजेशान घेतली. आशुतोष सिंग वैयक्तीक 55 धांवड्यांचेर लक्ष्य गर्गाच्या बॉलाचेर बोल्ड जालो. छत्तीसगडान आपली चवथी विकेट रोखडीच वगडायली. शुभमन अग्रवाल फकत एक धांवडी गरून तंबूंत परतलो. ताका दर्शन मिशाळान बाद केलो. कांय वेळान खेळ थांबोवपाचो निर्णय अंपायरांनी घेतलो.
पयल्या दिसाचो खेळ सोंपलो त्या वेळार हरप्रती सिंग भाटिया 22 आनी अमनदीप खरे शुन्याचेर खेळपट्टीचेर आशिल्लो.
गोंयान स बॉलरांचो वापर केलो. हातूंत विजेश प्रभुदेसायान सगल्यांत चड 2 जाल्यार लक्ष्य गर्ग आनी दर्शन मिशाळ हांकां दरेकी एक विकेट फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
