भांगरभूंय | प्रतिनिधी
भांगरभूंय । पत्रक
मडगांवः हांगच्या पार्वतीबाय चौगुले कॉलेजांत सोमाराक संवसारीक बुडपा पासून बचाव आनी संरक्षण दीस मनयलो. हालींसाराक खूब लोक बुडून मरपाच्यो घडणुको घ़डटात. त्यो जावच्यो न्हय हे खातीर लोकां मदीं जाग्रुताय करपाच्या हेतान हो दीस मनयतात.
लोक पेंवपाक वतात त्या सुवातांनी जाग्रुताय करपा खातीर सुचोवण्यो तकटे लोकांक कळटा ते भाशेंत आसप गरजेचें. विदेशी आनी देशी पर्यटकांक आनी राज्यांतल्या लोकांक तशेंच दर्यांत, न्हंयांनी न्हांवपाक वतना म्हत्वाच्यो सुचोवण्यो दिवपाची वेवस्ता दर एके सुवातेर आसपाक जाय, अशें कोंकणी विभाग मुखेली डॉ गुणाजी देसायान हांणी विद्यार्थ्यांक मार्गदर्शन करतना सांगलें. चौगुले कॉलेजाच्या कोंकणी विभागान चलो स्कूल मेगा ड्रायव वतीन बुडपा पसून बचाव आनी संरक्षण दीस मनयलो.
सुरवेक गुणाजी देसाय हाणें ह्या दिसाचें म्हत्व विद्यार्थ्यांक समजावन सांगलें. कोणय संकश्टांत सापडला वा बु़डटा जाल्यार आपणांकडेन जाता तसो आदार करपाक फुडें सरप सामकें गरजेचें अशें तांणी सांगलें. सुरवेक आदारा खातीर मोट्यान उलो मारप, लाइफ गार्डाक आपोवप, स्वताचे सुरक्षेची काळजी घेवन बचाव कार्य करून आपले परीन बुडप्यांक वाचोवपाचो यत्न करप अशेंय ताणें सुचयलें.
खास करून ल्हान भुरग्यांचेर खेळटना नदर दवरप, चडांत चड लोकांक पेंवपाक शिकोवप, उक्त्यो बांयो, तळीं, उदकाच्यो तांकयो हांकां सरयो मारुन वा दुरीग बांदून आडवण घालप, अचकीत उप्रासपी सैमीक आपत्तीच्या वेळार जतनाय घेवप आनी जागृताय करपारख्या विंगड विंगड गजालींतली खंयचीय एक गजाल करुन ह्या वावरांत योगदान दिवपाक विद्यार्थ्यांनी चलो स्कूल मेगा ड्रायव मोहीमेंतल्यान सुरवात करची, घरांतल्या लोकांकडेन, इश्टांकडेन उलयतना तांकां ह्यो गजाली सांगच्यो असो उलो ताणी विद्यार्थ्यांक मारलो. कोंकणी विभागाचे शिक्षक आनी विद्यार्थी ह्या कार्यक्रमाक हाजीर आशिल्ले. सहाय्यक प्राध्यापक ग्लिनीस डायस हाणें कोंकणी विभाग मुखेल्यान शिक्षणीक वर्साच्या पयल्याच दिसा पयल्या वर्साच्या विद्यार्थ्यांक संवसारीक पांवड्यावेली कार्यावळ आयोजीत करुन एक बरी संद दिवन समाजांत जागृताय निर्माण करपाच्या वावराक सुरवात केली म्हणून अभिनंदन केलें आनी तिनूय वर्सांच्या विद्यार्थ्यांचेय उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.