भांगरभूंय | प्रतिनिधी
इंडियन प्रिमीयर लीग 2023 खातीर बीसीसीआय नेटाची तयारी करीत आसा. त्याच वेळार बीसीसीआय बायलांची आयपीएल सर्त आयोजीत करपाक इत्सूक आसा. मार्च म्हयन्याच्या पयल्या सप्तका सावन बायलांची आयपीएलाक सुरवात जातली असो अदमास आसा. बीसीसीआयन मागयिल्ल्या प्रसारण हक्का खातीर व्हायकॉम 18न डिझनी स्टार आनी सोनीक फाटीं घालून पांच वर्सां खातीर 951 कोटींची सर्वोच्च बोली लायली. बीसीसीआयन फ्रॅंचायजी खरेदी खातीर बोली आमंत्रीत केल्ली. पूण, दादल्यांच्या आयपीएलांतल्या येसस्वी पंगडांतलो एक चेन्नय सुपरकिंग्सान बायलांचो आयपीएल पंगड खरेदी करपाचे प्रक्रियेंतल्यान फाटीं सरपाचो निर्णय घेतला.
तांणी हे प्रक्रिये खातीर कागदपत्रां घेतली. पूण, निमाण्या खिणाक तांणी फाटीं सरपाचो निर्णय घेतलो. चेन्नय सुपरकिंग्सा भशेन लखनौ सुपर जायण्ट्स आनी गुजरात टायटन्स हांणी लेगीत बायलांचो आयपीएल पंगड खरेदी प्रक्रियेंतल्यान फाटीं सरपाचो निर्णय घेतलो. तशेंच अदानी, हलदिराम आनी टोरेंट फार्मा ह्या मोठ्या कंपनींची अॅण्ट्री जाली.
पंजाब किंग्स बायलांचो आयपीएल पंगड खरेदी करपाक इत्सूक आसा. मुंबय इंडियन्स, कोलकाता नायटरायडर्स, सनरायझर्स हैदराबाद, रॉयल चॅलेंजर्स बंगळुरू, राजस्थान रॉयल्स हांणी बायलांचो पंगड खरेदी करपाक कागदपत्रांची पुर्तताय केल्या.
दिल्ली कॅपिटल्साचो मालकी हक्क आशिल्ल्या जेएसडब्ल्यून जीएमआर ग्रुपा वांगडा जोड रितीन बोली लायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
