भांगरभूंय | प्रतिनिधी
कोल्हापूरच्या प्रवाशाचें गोंय मुख्यमंत्र्यांक पत्र
भांगरभूंय I प्रतिनिधी
पणजी : मुख्यमंत्री डॉ. प्रमोद सावंत हांच्या नांवान पत्रादेवी शिमे वयल्या चेकपोस्टार पुलीस प्रवाशां कडल्यान पयशे घेतात. कोल्हापुरांतल्या एका वेवसायिकान आपले वांगडा घडिल्लो प्रसंग मेल वरवीं मुख्यमंत्री अानी पुलीस म्हासंचालक जसपाल सिंग हांकां कळीत केलो. ते उपरांत हो प्रकार उक्ताडार आयलो. हे घडणुकेची दखल घेवन सध्या चवकशी सुरू केल्या.
पी. के. पाटील ह्या कोल्हापुरच्या वेवसायिका वांगडा घडिल्लो प्रकार तांणें म्हयन्यां उपरांत मेलच्या माध्यमांतल्यान कळीत केलाे. मेळिल्ले म्हायती प्रमाण मुख्यमंत्र्यान पुलीस विभागाक संबंदीत पुलिसांक सोदून कारवाय करपाचो आदेश दिला. ते प्रमाण चवकशी सुरू जाल्या. पाटील हांणी संबंदींत पुलिसाची वळख पटोवपाची तयारीय दाखयल्या.
मजगतीं, घडणुकेचे सीसीटिव्ही फुटेज तपासले तेन्ना उपलब्ध नाशिल्ल्याचे लक्षांत आयलां. चेकपोस्टा वयले रेकॉर्डींग फक्त 45 दीस उरता. सायबर खात्याची मजत घेवन आदींचे फुटेज मेळोवपाचो यत्न करतले.
मुख्यमंत्री डॉ. सावंत हांचे वांगडा हाचे पयलीय अशी घडणूक घडिल्ली. 2019त तांचें नांव वापरून लांच घेवपाचो प्रकार घडिल्लो. जुलय 2021त तांचे फेसबूक अकावंट हॅक जाल्लें. तांच्या नांवार पयशे घेवपाचो प्रकार उक्ताडार आयिल्लो. आतां परतून पुलिसांनीच चेकपोस्टार प्रवाशा कडल्यान तांचें नांव वापरून पयशे मागपाचो प्रकार उक्ताडार आयला.
पुलीसूच करतात मुख्यमंत्र्यांच्या नांवाचो गैरवापर
कोल्हापुरांतले वेवसायीक पी. के. पाटील गोंयांतले आपलें काम सोंपोवन एका इश्टा वांगडा परत कोल्हापुरा वताले. पत्रादेवी चेकपोस्टार पुलिसांनी तांकां आडायले. येरादारीचे नेम मोडले म्हूण 500 रुपयांचो दंड केलो. ते प्रमाण पाटील हांणी 500 रुपया दिले आनी चलन घेतले. ते उपरांत ते वचपाक लागले, पूण पुलिसांनी तांकां आडायले. चेकपोस्टा लागसार अाशिल्ल्या एका दुकानदाराक एक हजार रुपया गुगल पे करपाची सक्ती केली. कारण विचारल्यार हे पयशे मुख्यमंत्र्यांक वतात, अशें पुलिसांनी सांगलें. निमाणे तांणी एक हजार रुपया दुकानदाराच्या नांवार गुगल पे केले. उपरांत पुलिसांनी तांकां वचपाक दिले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
