चित्रपट महोत्सवाचो उद्देश पर्याय दाखोवप

भांगरभूंय | प्रतिनिधी

नादव लापीडः व्हड पड्ड्याचेर चित्रपट पळोवप हो खोसदिणो अणभव आशिल्ल्याचें म्हणणें

भांगरभूंय । पीआयबी

पणजीः चित्रपट महोत्सव घडोवन हाडपा फाटली मुखेल संकल्पना म्हणल्यार एकूच प्रकारचे चित्रपट दाखोवप न्हय, तर वेगवेगळे पर्याय दाखोवप, अशें इझ्राएलचे दिग्दर्शक, लेखक आनी इफ्फीच्या आंतरराष्ट्रीय सर्तीच्या विभागांतल्या निर्णायक मंडळाचे अध्यक्ष नादव लापीड हांणी सांगलें. पीआयबीन आयोजीत केल्ल्या ‘टेबल टॉक्स’ कार्यावळींत ते उलयताले.

खूबशे चित्रपट महोत्सव आतां मिश्र पद्दतीन म्हणल्यार ऑनलायन आनी ऑफलायन पद्दतीन आयोजीत करतात, तरीय व्हड पड्ड्याचेर चित्रपट पळोवप हो खोसदिणो अणभव आसता. व्हड पड्ड्याचेर, एकठांय बसून बरो सिनेमा पळोवप हें मनीसपणाचें एक व्हड येस, अशें लापीड हांणी सांगलें.

इफ्फी आनी हेर चित्रपट महोत्सवांतल्या चित्रपटांची तुळा कशी करची ह्या प्रस्नाक जाप दितना लापीड हांणी सांगलें, दरेका सिनेमा महोत्सवाचें आपलें खाशेलपण आसता आनी तो हेरां परस वेगळो आसता, ताका लागून तांची तुळा करप कठीण.

आंतरराष्ट्रीय सर्तीच्या विभागांत वेंचून काडिल्ले चित्रपट उंचेल्या दर्जाचे आशिल्ले, मत जूरी वांगड्यांनी उक्तायलें, पूण त्याच वेळार निवड करतना सदांच सुदारणा करपाक संद आसता हेंवूय तांणी मान्य केलें.

इफ्फींत भरिल्लीं सिनेमाघरां आनी इतले लोक सिनेमा विशीं चर्चा करतात तें पळोवन आपूण खोशी जालो, अशें फ्रांसाचे ज्युरी वांगडी आनी डॉक्युमेंटरी फिल्म निर्माते झेव्हियर अँगुलो बार्तुरेन हांणी सांगलें. तशेंच प्रेक्षकांनी वचून व्हडल्या पड्ड्याचेर सिनेमा पळोवचे असोय सल्लो तांणी दिलो.

उत्कृश्ट चित्रपट महोत्सवांत पावचे हे खातीर कायम स्वरूपी प्रोग्रामर घेवपा खातीर वर्सभर प्रक्रिया गरजेची आसा, अशी सुचोवणी भारतांतले ज्युरी वांगडी, लेखक आनी दिग्दर्शक सुदीप्तो सेन हांणी केली.

आपणे पळयल्लो हो सगळ्यांत बरो आयोजीत केल्लो इफ्फी फेस्टिवल. एक देश म्हूण भारताची विविधताय, रंग आनी सादरीकरण सगळें खूब बरें आशिल्लें. इफ्फी एक महोत्सव म्हूण खूब परिपक्व जाला, अशें सेन हांणी सांगलें.

सिनेमांत बायलांचें प्रतिनिधित्व ह्या विशयाचेर स्पर्श करतना फ्रांसाची ज्युरी वांगडी आनी सिनेमा संपादक पास्कल चावन्स हांणी म्हणलें, आपणे जायत्यो बऱ्यो महिला कलाकार पळयले, पूण तांचे गुणपत्तेक संद दिवपी अश्यो भुमिका मात तांकां मेळूंक ना.

अमेरिकन एनिमेशन चित्रपट निर्माते जिंको गोटोहय आंतरराष्ट्रीय सर्तीच्या पंगडाच्या ज्युरी वांगड्या मदीं आशिल्लो. तशेंच ह्या परिसंवादांत वांटो घेवन एनएफडीसीचे वेवस्थापकीय संचालक रवींद्र बकर हांणी सांगलें, पणजेच्या मीरामार दर्यादेगेचेर 28 नोव्हेंबराक सकाळीं सुरू जावपी दर्यादेग नितळसाण मोहिमेकूय इफ्फी आदार करतली.

भांगराच्या मोराचे सर्तींत 15 चित्रपट

अंदूं इफ्फींत आंतरराष्ट्रीय सर्तींत प्रतिश्ठीत गोल्डन पीकॉक खातीर 15 चित्रपट सर्त करतात. उत्कृश्ठ चित्रपटां भायर आंतरराष्ट्रीय सर्तीचे ज्युरी उत्कृश्ठ दिग्दर्शक, उत्कृश्ट अभिनेतो, उत्कृश्ट अभिनेत्री आनी खाशेले ज्युरी पुरस्कार वेंचून काडटले. तशेंच 7 आंतरराष्ट्रीय आनी भारतीय फिचर फिल्मांतल्यान दिग्दर्शकाच्या सगळ्यांत बऱ्या पदार्पणाच्या फिचर फिल्माची निवड लेगीत ज्युरी करतले.