भांगरभूंय | प्रतिनिधी
वास्को: शुक्रारा फांतोडेर 3.30 वरांच्या सुमाराक चिखले रिमा बार्रा मुखा वयल्या सांकवांत एक मोटार सकयल पडून जाल्ल्या अपघातांत चार जाण जखमी जाले. तांकां उपचारा खातीर बांबोळे गोंय वैजकी म्हाविद्यालयाच्या हॉस्पिटलांत दाखल केल्यात.
जीए 06 ई 6451 क्रमांकाची मोटार शुक्रारा फांतोडेर कुठ्ठाळी सावन वास्को येताली. चिखलीच्या रिमा बार्रा मुखा वेल्या सांकवा कुशीक पावतकूच मोटार चालकाचें मोटारी वेलें नियंत्रण गेल्ल्यान मोटार सांकवा वयल्यान सकयल पडली.
ह्या अपघात प्रकरणांत वास्को पुलीस आनी उजो पालोवपी दळाक म्हायती दिली. म्हायती मेळटकूच उजो पालोवपी दळाचे जवान घडणूक थळार पावले. त्या मोटारींत आडकून पडिल्ल्यांक उजो पालोवपी दळाचे अधिकारी दिलीप बिचोलकार आन हेर जवानांनी भायर काडले. तांकां रोखडेच उपचारा खातीर हॉस्पिटलांत दाखल केले.
ह्या मोटारींत कुठ्ठाळीचे इझोन डिसोझा, गोवा वेल्हाचे मेशव्हीन सिल्वेरा, औदुंबर कामलेकार, आगशीचो एवीन रॉड्रिगीश आशिल्ले. हे सगले जखमी जाल्यात. पूण तांची भलायकी बरी आसा.
ह्या अपघातांत मोटारीचें व्हड प्रमाणांत लुकसाण जालां. ह्या अपघाताचो वास्को पुलिसांनी पंचनामो केला.
हाचे पयलीं ह्याच सांकवा वयल्यान एक टॅक्सी पडिल्ली. ह्या वाठारांत झोंपा वाडिल्ल्यान रस्त्याची रुंदाय लक्षांत येना. ताका लागून अपघाताक आमंत्रण मेळत आशिल्ल्याचो दावो थळाव्यांनी केला. ह्या प्रकरणांत संबंदीत यंत्रणेन लक्ष दिवपाची गरज तांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
