भांगरभूंय | प्रतिनिधी
७४६ जाणांक अटक, २८ प्रकरणांतल्या ३७ आरोपींक ख्यास्त
पणजी : राज्यांत १ जानेवारी २०२० ते १५ जून २०२४ ह्या साडे चार वर्सांच्या काळांत गोंय पोलिसांच्या घुवळे वखदां विरोधी पंगड, गुन्यांव फांटो शाखा तशेंच विवीध पुलीस स्टेशनांतल्या पुलिसांनी मेळून घुवळे वखदां तस्करी प्रकरणांत ६३३ गुन्यांव दाखल करून वट्ट ७४६ जाणांक अटक केली. तशेंच न्यायालयान २८ प्रकरणांतल्या ३७ आरोपींक ख्यास्त फर्मायल्या. अटक केल्ल्यां मदीं २८.२८ टक्के म्हळ्यार २११ गोंयकारांचो आस्पाव जाता, अशी म्हायती मुख्यमंत्री डॉ. प्रमोद सावंत हांणी लेखी जापेंत दिली.
हे विशीं मडगांवचे आमदार दिगंबर कामत हांणी लेखी प्रस्न दाखल केल्लो. मुख्यमंत्र्यांनी मुखार दिल्ले जापेंत, गोंय पुलिसां सयत विवीध विभागाच्या पुलिसांनी मेळून ड्रग्स तस्करी प्रकरणांत साडे चार वर्सांनी ६३३ गुन्यांव दाखल केल्यात. तातूंत ७४६ जाणांक अटक केल्या. तातूंत २११ गोंयकार, ४१९ बिगर गोंयकार आनी ११६ विदेशी नागरिकांचो आसपाव आसा.
आकडेवारी प्रमाण…
२०२०त १४८ गुन्यांव दाखल करून १७७ जाणांक अटक केल्ले. २०२१त १२१ गुन्यांव दाखल करून १३८ जाणांक अटक केल्ली. २०२२ त १५४ गुन्यांव दाखल करून १८९ जाणांक अटक केल्ली. २०२३त१४० गुन्यांव दाखल करून १६६ जाणांक अटक केल्या. जाल्यार २०२४त १५ जून मेरेन ७० गुन्यांव दाखल करून ७६ जाणांक अटक केल्या.
फाटल्या साडे चार वर्सांत दाखल केल्ल्या गुन्यांवांच्या फकत २८ प्रकरणांतल्या ३७ आरोपींक राज्यांतल्या वेगवेगळ्या न्यायालयांनी ख्यास्त फर्मायल्या. तातूंत ५ थळावे, २६ बिगर गोंयकार आनी ६ विदेशी लोकांचो आस्पाव आसा. हाचे भायर एका प्रकरणांत दुबाविताक मरण आयिल्ल्यान न्यायालयान ही केस बंद केल्या.
मजगतीं, पुरावे मेळूंक नाशिल्ल्यान स गुन्यांवांतल्यान ७ दुबावितांक न्यायालयान निरपराधी थारायल्यात. तशेंच प्रथम दर्शनी पुरावे नाशिल्ल्यान न्यायालयान तीन प्रकरणांतल्या स दुबावितांक निरपराधी थारायल्यात. तीन प्रकरणांचो निमाणो अहवाल पुलिसांनी न्यायालयांत सादर केला. हाचे भायर ४५७ प्रकरणांची सुनावणी राज्यांतल्या वेगवेगळ्या न्यायालयांनी आडकून आसा. तशेंच १३९ प्रकरणांत पुलीस चवकशी करतात अशी म्हायती मुख्यमंत्र्यानी लेखी जापेंत दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
