भांगरभूंय | प्रतिनिधी
भौशीक बांदकाम मंत्र्यान चार दिसां आदीं दिल्लें सुरळीत उदका पुरवण करपाचें उतर
भांगरभूंय । प्रतिनिधी
वाळपयः भौशीक बांदकाम मंत्री निलेश काब्राल हांणी चार दिसां आदीं वाळपय वाठारांत ‘सरकार तुमच्या दारी’ हो उपक्रम घेतिल्लो. सत्तरी म्हालांतल्या एकाय वाठारांत पियेवपाच्या उदकाचो उणाव जावचो ना, अशी घोशणा तांणी ह्या वेळार केल्ली. मात भिरोंडें पंचायत वाठारांतल्या वांते, मादय काराकोपरा, पेडांनी ह्या वाठारांनी फाटल्या चार दिसां सावन पियेवपाच्या उदकाचो खर उणाव जाला. ताका लागून थळाव्या लोकांनी खर तिडक उक्तायल्या.
‘सरकार लोकांच्या दारांक, पूण उदक ना घरांत’ अशी स्थिती सध्या भिरोंडें पंचायत वाठारांत निर्माण जाल्या. दोन दिसांनी उदका पुरवण जाग्यार पडली ना जाल्यार वाळपय उदका पुरवण कार्यालयाचेर मोर्चो व्हरतले, अशी शिटकावणी संबंदीत वाठारांतल्या थळाव्या लोकांनी दिल्या.
मेळिल्ले म्हायती प्रमाण चार दिसां आदीं भौशीक बांदकाम मंत्री निलेश काब्राल हांणी वाळपय पालिकेच्या सभाघरांत विशेश कार्यावळ आयोजीत केल्ली. सरकार लोकांच्या दारांत ह्या उपक्रमाच्या माध्यमांतल्यान सत्तरी म्हालांत पियेवपाच्या उदकाची समस्या आनी रस्त्यांचे सुविधे संबंदांत तांणी म्हालांतल्या सगळ्या सरपंच आनी पंच वांगड्यां कडेन थेट संवाद करून ह्या संबंदांत खोलायेन चर्चा केल्ली.
सत्तरी म्हालाच्या खूबशा वाठारांनी पियेवपाच्या उदकाचो खर उणाव जाता. ताका लागून येता त्या काळांत हो उणाव पुरायेन पयस जातलो आनी लोकांक पियेवपाच्या उदकाची सुविधा बरे तरेन मेळटली, अशे तरेनचें उतर मंत्री काब्राल हांणी ह्या वेळार दिल्लें. ताका लागून लोकांनी समाधान उक्तायल्लें. मात अजापाची गजाल म्हणल्यार मंत्री काब्राल हांचे भेटी उपरांत दुसऱ्या दिसा सावन पियेवपाच्या उदकाचो खर उणाव निर्माण जाला.
गोंय सरकाराचो ‘सरकार तुमच्या दारी’ हो उपक्रम म्हणल्यार लोकांच्या दोळ्यांक उदक लावपाचो प्रकार, असो आरोप थळाव्या लोकांनी केला. दोन दिसांनी उदका पुरवण सुटसुटीत जाली नाजाल्यार भर पावसांत वाळपयच्या उदका पुरवण कार्यालयाचेर मोर्चो व्हरतले, अशी शिटकावणी लोकांनी दिल्या. हे संबंदांत अदीक म्हायती दितना थळाव्या लोकांनी सांगलें, फाटल्या चार दिसां सावन ह्या वाठारांतले लोक वाळपय उदका पुरवण कार्यालयाच्या अधिकाऱ्यां कडेन संपर्क करपाचो यत्न करतात. लोक गंभीर स्थितीक फुडो करतात, मात ते अधिकारी कानाचेर हात दवरतात. पावसाच्या दिसांनी पियेवपाच्या उदकाचो उणाव जावप ही गजालूच सामकी तिडक मारपा सारकी. हे गजाली कडेन भौशीक उदका पुरवण कार्यालयाचे अधिकारी कित्याक आडनदर करतात, असो प्रस्न थळाव्या लोकांनी उपस्थीत केला.
अधिकारी कांयच कानामनार घेनातः उदयसिंह राणे
भिरोंडें पंचायत वाठारांत निर्माण जाल्लो उदकाचो उणाव लोकां खातीर खूब त्रासाचो जाला. चार दिसां सावन नळाक उदक येना. हे संबंदांत आपणे खूब खेपे अधिकाऱ्यां कडेन संपर्क करपाचो यत्न केलो, पूण ते कांयच कानामनार घेनात. भौशीक बांदकाम मंत्री निलेश काब्राल हांणी सत्तरी म्हालांत पुराय तांकीन उदका पुरवण करपाचें उतर दिल्लें. मात सध्या भिरोंडें पंचायत वाठारांत निर्माण जाल्ल्या उदकाच्या उणावाक लागून लोकांनी मंत्री काब्राल हांच्या विधानाचेर चाळवल्यात, अशें भिरोंडेंचे सरपंच उदयसिंह राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.