भांगरभूंय | प्रतिनिधी
मुख्यमंत्री डॉ. प्रमोद सावंतः स्वंयपूर्णतेचें सपन पुराय करपाक दरेकल्यान फुडें सरपाचो उलो
भांगरभूंय । प्रतिनिधी
दिवचलः गोंयकारपण हें फकत भाशणां पुरतेंच मर्यादीत दवरिनासतना दरेका गोंयकारान स्वयंपूर्णतेचें सपन पुराय करचे खातीर मुखार सरपाची गरज आसा. चवथी निमतान सुरू केल्ल्या स्वयंपूर्ण चवथीचो बाजार गोंयांत 12 म्हालांतल्या 22 सुवातांचेर सुरू केला. लोकांनी ह्या बाजारांत चडांत चड खरेदी करून आदार करचो, असो उलो मुख्यमंत्री डॉ. प्रमोद सावंत हांणी मारलो.
सांखळे कदंबा बसस्टॅण्डाच्या आवारांत सुरू केल्ल्या चवथीच्या बाजारांतल्या स्टॉल्सांचें उक्तावण मुख्यमंत्री डॉ. सावंत हांचे हस्तुकीं जालें. ह्या वेळार ते उलयताले.
आत्मनिर्भर भारत स्वयंपूर्ण गोंयचें सपन पुराय करचे खातीर प्रधानमंत्री नरेंद्र मोदी हांणी मारिल्ल्या उल्याक राज्य सरकारान पुराय प्रतिसाद दिला. गोंयचें सपन साकार करचे खातीर फलोत्पादन, जनावरां पोसप, दूद उत्पादन, नुस्त्याची शेती, तेचवांगडा सगळ्याच मळांच्या माध्यमांतल्यान लोकांक विवीध येवजण्यांच्या माध्यमांतल्यान आदार करतात. सरकाराच्या ह्या यत्नांक बरो प्रतिसाद मेळटा. ताका लागून दरेका हाताक काम दितना दरेक कुटुंब आत्मनिर्भर आनी स्वयंपूर्ण जातलें, हो आपलो ध्यास आसा. ताका लागून सरकार सगळे तरेची मजत करता. दरेकल्यान ह्या विशेश उपक्रमाक आदार करचो, असोय उलो मुख्यमंत्री डॉ. सावंत हांणी मारलो. ह्या वेळार भाजपा मंडळ अध्यक्ष गोपाळ सुर्लकार, नगरसेवक आनंद काणेकार, दयानंद बोर्येकार, कबीर शिरगांवकार, शुभदा सावयकार आनी हेर मानेस्त हाजीर आशिल्ले.
सांखळे चवथीच्या बाजारांत 22 स्टॉल्स
सांखळे सुरू केल्ल्या चवथीच्या बाजारांत 22 स्टॉल्स मांडल्यात. तांची मुख्यमंत्री डॉ. प्रमोद सावंत हांणी पळोवणी करून विवीध वस्तू खरेदी केल्यो. सरकारान सगळी वेवस्था फुकट दिल्या. ह्या स्टॉल्सांचेर लोकांनी खरेदी करून उपक्रमाक आदार करचो, असो उलो मुख्यमंत्र्यान मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
