भांगरभूंय | प्रतिनिधी
फलोत्पादन म्हामंडळः 10 टन अदीक भाजी आयात
पणजीः चवथीच्या काळांत लोकांक भाजयेची पुरवण उणी जावची न्हय हे खातीर फलोत्पादन म्हामंडळा वतीन दर दिसा 10 टन अदीक भाजी आयात करता. सध्या दिसाक सुमार 100 टन भाजी लागता, अशी म्हायती फलोत्पादन म्हामंडळाचे वेवस्थापकीय संचालक चंद्रहास देसाय हांणी दिली.
चवथीच्या काळांत लोकांक बरी आनी उण्या दरांत भाजी मेळची हे खातीर व्हड प्रमाणांत भाजी आयात करतात. चवथीच्या आदल्या दिसा टोंक, आल्तीन तशेंच पणजी ह्या तीन म्हामंडळाच्या दुकानांचेर दिसाक एक लाख रुपयांची भाजी विक्री जाल्या. लोकांक बरी आनी उण्या दरांत भाजी मेळची हे खातीर व्हड प्रमाणांत भाजी आयात केल्या. तशेंच थळाव्या शेतकारांनी पिकयिल्ली सुमार 10 टन भाजी दर दिसा येता. ताका लागून चवथीच्या काळांत लोकांक भाजयेचो उणाव जावचो ना, अशें देसाय हांणी सांगलें. दुसऱ्या राज्यांतल्यान आमकां चडांत चड कांदो, बटाट, टोमाट, कोबी, फ्लावर हे सारक्यो भाजयो हाडच्यो पडटात. भेंडो, चिटकी, तवशीं, वायंगीं, मिरसांग, दुदी हे सारक्यो भाजयो गोंयांतल्या शेतकारां कडल्यान व्हड प्रमाणांत विकत घेतात. गोंयांतल्या शेतकांनी व्हड प्रमाणांत भाजयेची पुरवण केल्या. तांकां फलोत्पादन म्हामंडळा कडल्यान बरो दर दितात. फलोत्पादनाच्या दुकानां वयल्यान थळाव्या शेतकारांचे भाजयेक व्हड मागणी आसात. खंयच्याच शेतकाराची भाजी आमी परतून दिनात, अशें देसाय हांणी सांगलें.
गांवठी भाजयेक चड मागणीः देसाय
फलोत्पादन म्हामंडळा कडेन गिरायकांची गांवठी भाजयेक चड मागणी आसा. ताका लागून थळाव्या शेतकारांची भाजी घेवपाक म्हामंडळ चड भर दिता. चडांत चड दर दिवन आमी ती भाजी घेतात आनी उण्या दरांत विकतात. गोंयांतली तवशीं, मिरसांग आमी दुसऱ्या राज्यांत निर्गत करतात, अशें चंद्रहास देसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
