भांगरभूंय | प्रतिनिधी
भांगरभूंय । खबरां मेज
पर्वरीः कुणाल महाजनाचो नाबाद शेंकडो तशेंच अर्लसान खान आनी राजांगड बाबा हांच्या अर्द शेंकड्यांच्या नेटार चंदिगडान रणजी मॅचीचे तिसऱ्या दिसा गोंयांक 5 आवट 348 अशी जाप दिली. पीसीएचेर खेळयतात त्या हे चार दिसाचें मॅचींत गोंयांन आपलो पयलो डाव 7 आवट 618 धांवड्याचेर घोशीत केल्लो. फाल्यां (सोमार) हे मॅचीचो निमणो दीस आसा. मॅच डॅॉ जातली अशें दिसता. पयल्या डावांत कोण आघाडी घेता तें म्हत्वाचें थारतलें. चंदिगडाक गोंयांचेर पयल्या डावांत आघाडी घेवपा खातीर आनीक 271 धांवड्यो जाय. तांचे कडेन 5 विकेटी आसात.
चंदिगडान 1 आवट 73 धांवड्या वयल्यान आयतारा आपलो खेळ सुरु केलो. 85 धांवड्यो जाल्यो तेन्ना नायटवॉचमन अर्पित सिंगाक (9) अर्जुन तेंडुलकारान एलबीडब्ल्यू केलें. कॅप्टन मनन व्होरा सुरवेक सावन आक्रमक खेळ केलो. मात फुडें येवंन मोहित रेडकाराक सको मारपाच्या यत्नांत आसतना फाटल्यान विकेटकीपर समर दुभाषीन आपलें काम फत्ते केलें. मनन 25 धांवड्यो करून आवट जालो. ते उपरांत तंत्रशुद्ध बॅटिंग करपी अर्सलान खानाक (101 बॉलांत 84) लक्षय गर्गान एलबीडब्ल्यू केलें.
ते उपरांत आयिल्लो गौरव पुरी चड वेळ तिगलो ना. ताका स्लीपांत सुयश प्रभुदेसायान कॅप्टन दर्शन मिशाळ्याचे बॉलाचेर कॅच आवट केलें. तो आवट जातगीर कुणाल महाजनान (नाबाद 148) आनी राजांगड बावा (नाबाद 64) हांणी चंदिगडाकचे आनीक लुकसाण जावपाक दिलें ना. तांणी 6वे विकेटी खातीर नाबाद 148 धांवड्याची भागिदारी केली. गोंयां खातीर मोहित रेडकारान 2, दर्शन मिशाळ, अर्जुन तेंडुलकार आनी लक्षय गर्गान दरेकी एक विकेट घेतली
स्कोरः गोय-पयलो डाव 7 आवट 618 घोशीत. चंदिगड पयलो डाव- 1 आवट 73 वयल्यान- अर्सलान खान- एलबीडब्ल्यू बॉ. लक्षय गर्ग- 84, अर्पित सिंग – एलबीडब्ल्यू बॉ- अर्जुन तेंडुलकार-9, मनन व्होरा, स्टम्पआवट समर दुभाषी बॉ- मोहित रेडकार, कुणाल महाजन नाबाद 109, गौरव पुरी कॅ- ,सुयश प्रभुदेसाय बॉ- दर्शन मिशाळ-21, राजांग बावा नाबाद-64, एक्स्ट्रा- 13, वट्ट 5 आवट 348.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
