भांगरभूंय | प्रतिनिधी
वाळपय : सेगीत पडपी पावसाक लागून केरी सत्तरींतले अंजुणें धरण 90 मिटरा वयर भरला. मात, व्हाळवाट आनी कश्टी न्हंयेंचें उदक फुगिल्ल्यान धरणाचें उदक सोडूंक आडखळ येता. उदक सोडल्यार न्हंये कुशीच्या वाठारांनी हुंवार येवपाक शकता. सध्या तरी उदक सोडपा सारकी परिस्थिती ना, अशें अंजुणें धरणाच्या वेवस्थापनान स्पश्ट केलां.
मजगतीं, सत्तरीचे मामलेदार विरेंद्र बाणावलीकार आनी जोड मामलेदार विष्णू राणे हांणी धरणाची पळोवणी केली. धरण प्रकल्पाचे जोड अभियंता दिलीप गांवकार हांणी परिस्थिती विशीं तांकां म्हायती दिली.
सांखळेच्या व्हाळवाट आनी दिवचलच्या कश्टी न्हंयेंक हुंवार आयिल्ल्यान न्हंये भायर येवपी उदक पंपींग करून परत न्हंयेंत सोडप चालूच आसा. पावसान मात्सो विसव घेतिल्ल्यान परिस्थिती नियंत्रणांत आसा.
धरणांतल्यान उदक सोडपाचें थारल्यार लोकांक कळीत करतले, सोशल मिडियाचेर येवपी खबरांचेर विस्वास दवरूं नाकात म्हूण संबंधीत अधिकाऱ्यांनी उलो मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
