भांगरभूंय | प्रतिनिधी
कोणाकूच सोडचे नात, कोण सांपडटा तो बंदखणींत
पणजी: येता त्या तीन म्हयन्यांनी गोंयांतलीं घुंवळे वखदांची पाळांमुळां खणून काडटले. गोंयांत पर्यटक पर्यटनाचो आनंद लुटूंक येतात, घुंवळे वखदां खातीर न्हय हो संदेश संवसाभर दितले अशी गवाय मुख्यमंत्री डॉ. प्रमोद सावंत हांणी प्रुडंट खबरा चॅनलाचे ‘हेडऑन’ कार्यावळींत उलयतना दिली.
भाजपाच्यो फुडारी आनी अभिनेत्री सोनाली फोगट मरण प्रकरणाक घुंवळे वखदाचें मोडण मेळ्ळे उपरांत कांय थळाव्या तरणाट्यांचीं नांवांय मुखार आयलीं. आतां मेरेन घुंवळे वखदां प्रकरणांत गोंया भायल्यांचेर कारवाय जाताली. पूण आतां हातूंत थळाव्यांचीं नांवां येत आशिल्ल्यान गोंया खातीर घुंवळे वखदांचो विशय हुस्क्याचो जाला. फकत पयशां खातीर गांवगिऱ्या वाठारांतले तरणाटे घुंवळे वखदांच्या चपक्यांत आडकत चल्ल्यात. हातूंतल्यान तांकां भायर काडपा खातीर मुख्यमंत्री तशेंच गृह मंत्री ह्या नात्यान आपणे स्वता अशा प्रकरणाचेर लक्ष केंद्रीत केलां अशें मुख्यमंत्री डॉ. प्रमोद सावंत हांणी म्हणलें.
गोंयांतल्यान घुंवळे वखदां मुळा सावन नश्ट करपा खातीर गोंयचो घुंवळे वखदां विरोधी पंगड पुराय तांकीन कार्यरत आसा. हाचे मुखार ह्या पंगडाक गरज आसा तितलें मनीसबळ दिवन घटाय हाडपाचो निर्णय आपणे घेतला. पंगडा वतीन आतां मेरेन गोंयांतल्या विवीध वाठारांनी ड्रग्ज विरोधी लोकजागृताय जाल्या. हाचे मुखार जागृतायेचेर आनीक भर दितले अशें तांणी सांगलें.
मजगतीं, आतां मेरेन गोंयांत सत्तेंत आयिल्ल्या दरेक सरकारान आपले परीन ड्रग्जाचेर मात करपाचो यत्न केला. फाटल्या कार्यकाळांत मुख्यमंत्री म्हूण आपणें घुंवळे वखदांचो विशय सोंपोवपाचे नदरेन खूबशीं धाडशीं पावलां उबारिल्लीं. घुंवळे वखदां तस्करांचे भेंड मोडपा खातीर घुंवळे वखदां विरोधी पंगडाक पुराय स्वातंत्र्य दिल्लें. ताका लागून ह्या काळांत पंगडाक विवीध प्रकारचीं सुमार तीन कोटी रुपयांचीं घुंवळे वखदां जप्त करून खूबशा जाणांक अटकूय केल्ली. ह्या कार्यकाळांतूय हाचे मुखार घुंवळे वखदां आड कारवाय गतीन करतले. कोणाकूच सोडचे नात. जो सांपडटा ताका बंदखणींत उडयतले अशी शिटकावणीय मुख्यमंत्री डॉ. प्रमोद सावंत हांणी दिली.
गोंय पुलिसांचेर पुराय विस्वास
सोनाली फोगट हत्या प्रकरण हायप्रोफायल आशिल्ल्यान तांच्या कुटुंबान हरयाणा मुख्यमंत्र्या कडेन सीबीआय चवकशी करपाची मागणी केल्ली. ते प्रमाण तांणी आपले कडेन संपर्क सादिल्लो. पूण ह्या प्रकरणांत गरज आसल्यारूच हें प्रकरण सीबीआय कडेन दितले अशें आपणें तांकां सांगिल्लें. ह्या प्रकरणांत गोंय पुलिसांनी पारदर्शक तपास केला. थळाव्या पुलिसांचेर आपलो पुराय विस्वास आसा अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
