भांगरभूंय | प्रतिनिधी
विमानतळ प्राधिकरणा आड कारवाय करची: चिखली सरपंचाची मागणी
वास्को: आसय-दोंगरी, दाबोळी हांगासरले सैमीक झरयेंत दाबोळी विमानतळा वयल्या घाण उदका प्रक्रिया प्रकल्पांतलें घाण उदक सोडिल्ल्यान झरयेंतलें उदक दुशीत जालां. ह्या प्रकरणांत चिखलीचे सरपंच कमलाप्रसाद यादव हांणी तिडक उक्तावन झरयेंतलें उदक दुशीत करपी विमानतळ प्राधिकरणा आड खर कारवाय करपाची मागणी केल्या.
हे सैमीक झरयेंत घाण उदक सोडीत आशिल्ल्यान थंयचें उदक दुशीत जालांच. तशेंच घाणीचेंय साम्राज्य पातळ्ळां. हे विशीं थळाव्या लोकांनी कागाळी लेगीत केल्ल्यो. कांय जाणांनी दाबोळी विमानतळ प्राधिकरणाक खासा पत्र लेगीत बरयिल्लें. पूण घाण उदक आमी सोडिनात, घडये तें उदक नौदळाचें आसुये अशें स्पश्टीकरण दिवन विमानतळ प्राधिकरणान हात वयर काडिल्ले.
फाटल्या कांय दिसांनी थंय सुमारा भायर घाण पातळिल्ल्यान थळाव्या लोकांनी तिडक उक्तायिल्ली. म्हामार्गा वयल्यान वतना लेगीत वाहनचालकांक ह्या घाणीचो त्रास सोंसचो पडटालो. हाचे वयल्यान घाणीची खरताय लक्षांत येताली.
हे विशीं केल्ले कागाळेची दखल घेवन चिखली पंचायत, गोंय राज्य प्रदुशण नियंत्रण मंडळ, भलायकी खात्याचे अधिकारी हांणी मंगळारा सकाळीं जोड तपासणी केली. ह्या तपासणी वेळार विमानतळ प्राधिकरणाच्या प्रकल्पांतल्यान घाण उदक सोडटल्याचें उक्ताडार आयलें.
विमानतळ प्राधिकरणाचो घाण उदक प्रक्रिया प्रकल्प उण्या तांकीचो आसा. ताका लागून अदीक तांकीन एकठांय जाल्लें घाण उदक गटारांतल्यान सैमीक झरयेंत सोडटात. हे संबंदीचें चित्रिकरण केलां. तांचो प्रकल्प इबाडिल्लो आसत जाल्यार तांणी तो सारको करूंक जाय. ह्या प्रक्रिया प्रकल्पाचें देखभालीचें काम कंत्राटदाराक दिलां. ताका हे विशींची जाप विचारपाची गरज आशिल्ली. पूण कंत्राटदार आनी विमानतळ प्राधिकरणान प्रकरण गंभीरतायेन घेवंक नाशिल्ल्याचें दिसून आयलें. जोड तपासणे वेळार आमी विवीध प्रवाह तपासले. त्या वेळार प्रक्रिया करूंक नाशिल्लें घाण उदक सोडीत आशिल्ल्याचें दिसून आयलें अशें चिखलीचे सचीव अमृत सांखळकार हांणी सांगलें.
ह्या प्रकरणांत गोंय राज्य प्रदुशण नियंत्रण मंडळान उदकाचे नमुने एकठांय केल्यात. तांचे कडल्यान आयिल्लो अहवाल आमी बसकेंत दवरतले अशें तांणी स्पश्ट केलें. ह्या प्रक्रिया प्रकल्पाक गरजेची आशिल्ली ती तांक ना, तशेंच तो सुसज्ज ना. ताका लागून थंय उदकाची प्रक्रिया जायना अशेंय तांणी म्हणलें.
हे सैमीक झरयेंतलें उदक थळावे लोक दीसपट्ट्या वापरा खातीर वापरताले. तें दुशीत जाल्ल्यान तांचे मुखार प्रस्न उबो रावला. सरकारी यंत्रणेक लेगीत भियेनासतना घाण उदक ते झरयेंत सोडपी कंत्राटदारा आड खर कारवाय करपाची गरज आसा. थंयचें उदक पयलीं भशेन करपा खातीर ताका भाग पाडूंक जाय. तशेंच दंडात्मक कारवाय जावप गरजेची आशिल्ल्याची प्रतिक्रिया थळाव्या लोकांनी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
