भांगरभूंय | प्रतिनिधी
म्हापशें ः शिवोली आनी साळगांव ह्या वाठारांनी घरफोडी करून 15 लाख रुपयांचो म्हालवज फारावपी बिहारी टोळयेक अटक करतल्या उत्तर गोंय पुलीस पंगडाचो पुलीस खात्याचे वतीन भोवमान केलो.
हे चोरयेची घडणूक 15 आनी 16 मे 2022 दिसा घडिल्ली. केरेवाडी-शिवोलेची रेस्टाॅरण्ट धनी मारिया ग्राना हांच्या घरांतल्यान 15.13 लाख रुपयांचो म्हालवज फारायिल्लो जाल्यार ताब्रावाडो-साळगांवची आदली सरपंच लाफेरा गोम्स हांच्या घरांतल्यान सुमार 40 हजारांचो म्हालवज चोरिल्लो.
ह्या प्रकरणांत सुंदर फजलू खान ह्या खांप्या चोरा सयत मिथुन कुमार परिहार, अरूणकुमार तंती, शेख राजू (सगले मूळ बिहार) आनी परम चोडणकार (बादें-आसगांव) हे बिहारी टोऴयेक दिल्ली, बिहार आनी गोंयांत धाडी घालून पुलिसांनी 16 जुलयाक अटक केल्ली आनी दुबावितां कडल्यान चोरयेचो कांय म्हालवज जप्त केल्लो. ह्या प्रकरणांतले नदीम आनी मिस्टर हे दोग दुबावीत अजून फरार आसात.
उत्तर गोंय पुलीस अधिक्षक शोबित सक्सेना हांच्या फुडारपणा खाला ही कामगिरी करपी उपअधिक्षक जिवबा दळवी, निरिक्षक प्रशल नायक देसाय, सचिन लोकरे, विक्रम नायक, विद्यानंद पवार, उपनिरिक्षक अतिकेश खेडेकार, विराज कोरगांवकार, धीरज देविदास, तेजेशकुमार नायक, स्नेहा सावळ, साहिल वारंग, सहाय्यक उपनिरिक्षक मोहन परब, हवालदार अनिल पिळगांवकार, काॅन्स्टेबल रुपेश आजगांवकार, मयूर घाडी, राहुल अंगोलकर, नितिकेश नायक, श्रीकृष्ण रेडकार, स्नेहल मळीक, रामदास हरमलकार आनी सत्येंद्र नास्नोडकार हांचो पुलीस खात्याचे वतीन पुलीस महानिरिक्षक ओमविर सिंग हांचे हस्तुकीं भोवमान जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.