भांगरभूंय | प्रतिनिधी
वखदांचे निर्गतीक लागून दर वर्सा जाता तपासणी
पणजी : वखदांचे निर्मिती खातीर वातावरण पुरक नाशिल्ल्या कारणान अमेरिकेच्या अन्न आनी वखदां प्रशासनान ग्लेनमार्क आनी सिप्ला कंपनीच्या गोंय फांट्याक शिटकावणेची पत्रां जारी केल्यांत. दोनूय कंपनीं अमेरिकेक वखदांची निर्गत करतात. हे खातीर तांकां शिटकावणेची पत्रां जारी केल्यांत.
ग्लेनमार्क कंपनीचो कोलवाळे निर्मिती प्रकल्प आसा जाल्यार सिप्लाचो वेर्ण्यां प्रकल्प आसा. अमेरिकेच्या अन्न आनी वखदां प्रशासन फांट्या कडल्यान शिटकावणेचीं पत्रां आयिल्ल्याची म्हायती कंपनीच्या अधिकृत गोपां कडल्यान मेळ्ळ्या.
अमेरिकेच्या अन्न आनी वखदां प्रशासनान ग्लेनमार्काच्या प्रकल्पाची मे म्हयन्यांत पळोवणी केल्ली. वखदांचे निर्मिती खातीर पुरक वातावरण नाशिल्ल्यान कारवायेची कल्पना कंपनीक दिल्ली. हरकत घेवपा सारकी स्थिती प्रकल्पांत पळोवणी करतकूच दिसून आयली. कारवायेची शिटकावणी अमेरिकी एफडीएन दिल्ली.
प्रकल्पांत सुदारणा करपा सयत वातावरणांत लेगीत सुदारणा करपाचो आराखडो तयार आशिल्ल्याचें सिप्ला कंपनीन सांगलां.
अमेरिकी एफडीए कडल्यान शिटकावणेचीं पत्रां आयलीं तरी ताचो वखदांची निर्मिती आनी प्रकल्पाचेर परिणाम जावचो ना. कंपनीच्या येणावळीचेर हाचो कसलोच परिणाम जावचो ना अशें ग्लेनमार्क कंपनीन स्पश्ट केलां. अमेरिकी एफडीएन जे आक्षेप घेतल्यात, तांचो अभ्यास कंपनीन सुरू केला. जी कितें सुदारणा करपाक जाय ती प्रकल्पांत जातली. अमेरिकी एफडीएच्या सुचोवण्यांची कारवाय जातली. निर्मितीचो दर्जो हो सेगीत सर्वोत्तम आसतलो, हाची हमी कंपनीन दिल्या.
विदेशी अन्न आनी वखदां प्रशासन फांट्या कडल्यान वखदां निर्मिती प्रकल्पांची नेमान पळोवणी जाता अशी म्हायती एफडीएच्यो संचालक ज्योती सरदेसाय हांणी दिली. ग्लेनमार्क आनी सिप्ला ह्यो कंपनीं अमेरिकेंत वखदां आनी गुळयांची निर्गत करतात. हाका लागून दोनूय प्रकल्पांची अमेरिकी एफडीए कडल्यान पळोवणी जाता. ज्या देशांत वखदां कंपनीं कडल्यान वखदांची निर्गत जाता, त्या देशांतली एफडीए, कारखानो वा प्रकल्पांक भेट दिवन पळोवणी करतात. ग्लेनमार्क आनी सिप्ला सोडून गोंयांत हेर खूबशो फार्मास्युटीकल कंपनीं आसात. विदेशी एफडीए ह्या आस्थापनांक लेगीत भेट दिवन पळोवणी करतात अशें गोंयची एफडीए संचालक ज्योती सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
