भांगरभूंय | प्रतिनिधी
कार्यवाही खातीर रान आनी नगरपालिका प्रशासन अधिकार्यांची समिती वेंचतले
पणजी : हवामान शितळ राखपा खातीर नगरपालिका वाठारांतले मेकळ्या सुवातांचो ग्रीन लंग्स म्हणल्यार झाडां लावन रानाची उदरगत करपाचो प्रस्ताव आसा. हाका लागून राज्यांतल्या नागरिकां कडल्यान सुचवण्यो मागयल्यात. कार्यवाही खातीर रान खातें आनी नगरपालिका प्रशासन खात्यांच्या अधिकार्यांची समिती स्थापन करतले अशी म्हायती रान खात्याचे मंत्री विश्वजित राणे हांणी दिली.
रान मंत्री विश्वजित राणे हांचे अध्यक्षते खाला बसका जाली. हे बसकेंत येवजणेच्या कार्यवाहीचेर विचार केलो. स्टुडीओ पीओडी हे एजन्सीचे मजतीन प्रकल्पाची कार्यवाही जातली. नगरपालिका वाठारांतले मेकळे सुवातींचो सोद घेतले. हें काम नगरपालिकेक करचें पडटलें. नगरपालिकां कडल्यान सुचवण्यो मागयतले. मेकळ्या सुवातांचो सोद घेतले उपरांत टप्प्याटप्प्यांनी झाडां लावन ग्रीन लंग्स उबारतले. कार्यवाही तशेंच आढावो घेवपाक समिती स्थापन करपाचेर चर्चा जाली. मेकळ्या सुवातांचो सोद आनी सुचवण्यो आयले उपरांत फुडलीं कामां सुरू जातलीं, अशी म्हायती एका अधिकार्यान दिली. नगरपालिकांक जो निधी दितात ताचो वापर ग्रीन लंग्स खातीर करतले. गरज पडल्यार खास निधीची तरतूद करतले. ग्रीन लंग्स उपक्रमा विशीं जाल्ली ही दुसरी बसका. ह्यान पयलीं बसका जाल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
